ပြည်ထောင်စုစာရင်းစစ်ချုပ်ရုံး၊ နေပြည်တော်သင်တန်းကျောင်းတွင် ဖွင့်လှစ်သည့် အခြေခံစာရင်းကိုင်နှင့် ရုံးလုပ်ငန်းကျွမ်းကျင်မှုသင်တန်းအမှတ်စဉ်-၂၃၄ သင်တန်းဖွင့်ပွဲအခမ်းအနားကို ၁-၁၂-၂၀၂၂ ရက်နေ့ မွန်းလွဲ ၂ နာရီတွင် နေပြည်တော်ရှိ ပြည်ထောင်စုစာရင်းစစ်ချုပ်ရုံး၊ စုပေါင်းခန်းမ၌ ကျင်းပရာ ပြည်ထောင်စုစာရင်းစစ်ချုပ် ဦးတင်ဦး တက်ရောက်၍ သင်တန်းဖွင့် အမှာစကားပြောကြားခဲ့သည်။

သင်တန်းဖွင့်ပွဲအခမ်းအနားတွင် ပြည်ထောင်စုစာရင်းစစ်ချုပ်က ပြည်ထောင်စုစာရင်းစစ်ချုပ်ရုံးသည် အစိုးရဌာန၊ အဖွဲ့အစည်းများရှိဝန်ထမ်းများအနေဖြင့် ရုံးလုပ်ငန်းများ ဆောင်ရွက်ရာတွင် စွမ်းဆောင်ရည်ပြည့်ဝစွာ ဆောင်ရွက်နိုင်စေရန်အတွက် အခြေခံအဆင့်၊ အလယ်အလတ်အဆင့်နှင့် အဆင့်မြင့်စာရင်းကိုင်နှင့်ရုံးလုပ်ငန်းကျွမ်းကျင်မှုသင်တန်းများကို ၁၉၆၀ ခုနှစ်မှစ၍ ရန်ကုန်မြို့၊ သင်တန်းကျောင်းတွင် စတင်ဖွင့်လှစ်သင်ကြားခဲ့ပါကြောင်း၊ နေပြည်တော်၊ သင်တန်းကျောင်းတွင် ၂၀၀၇ - ၂၀၀၈ ခုနှစ်မှစ၍ ဖွင့်လှစ်ခဲ့ပြီး သင်တန်းအမှတ်စဉ် - ၂၃၃ အထိ သင်တန်းသား ၄၀,၂၉၁ ဉီး တက်ရောက်ပြီးမြောက်ခဲ့ပြီး ဖြစ်ပါ ကြောင်း။

ယခုအခြေခံစာရင်းကိုင်နှင့် ရုံးလုပ်ငန်းကျွမ်းကျင်မှုသင်တန်းကို အခြေခံစာရင်းပညာ နားလည်တတ်ကျွမ်းပြီး မှားယွင်းမှု၊ လေလွင့်ဆုံးရှုံးမှုများ မရှိစေရန်နှင့် ရုံးလုပ်ငန်းများကို စွမ်းဆောင်ရည် ပြည့်ဝစွာဖြင့် စည်းမျဉ်း၊ စည်းကမ်းများနှင့်အညီ ဆောင်ရွက်နိုင်စေရန် ရည်ရွယ်ဖွင့်လှစ်ရခြင်း ဖြစ်ပါကြောင်း၊ သင်တန်းတွင် ပို့ချမည့်ဘာသာရပ်များသည် လက်တွေ့လုပ်ငန်းခွင်တွင် အမှန်တကယ်လိုအပ်ပြီး ဝန်ထမ်းတစ်ဦးးအနေဖြင့် ကျွမ်းကျင်တတ်မြောက်ထားရမည့် အခြေခံပညာရပ်များဖြစ်ပါကြောင်း၊ သို့ပါ၍ သင်တန်းမှပို့ချမှုများကို အလေးထား လေ့လာဆည်းပူး၍ နိုင်ငံနှင့်ဌာနအတွက် အားထားရသည့်  အရည်အချင်းပြည့်ဝသည့် ဝန်ထမ်းကောင်းများ ဖြစ်စေရေး ကြိုးစားကြစေလိုပါကြောင်း တိုက်တွန်းပြောကြားခဲ့သည်။ 

ထို့နောက် ပြည်ထောင်စုစာရင်းစစ်ချုပ်ရုံး (နေပြည်တော်) သင်တန်းကျောင်း၊ ကျောင်းအုပ်က သင်တန်းဆိုင်ရာအချက်အလက်များကို ရှင်းလင်းပြောကြားခဲ့သည်။

ယခုသင်တန်းကို စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန၊ လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန၏ ဝန်ထမ်းများတက်ရောက်နိုင်ရေးအတွက် အထူးအစီအစဉ်အနေဖြင့် ရန်ကုန်တိုင်းဒေသကြီး၊ တိုက်ကြီးမြို့နယ်ရှိ  ဗဟိုမြေစာရင်းဖွံ့ဖြိုးမှု လေ့ကျင့်ပညာပေးရေးသင်တန်းကျောင်း၊ နေပြည်တော်သင်တန်းကျောင်းနှင့်တစ်ပြိုင်တည်း ဖွင့်လှစ်သင်ကြားသွားမည်ဖြစ်သည်။

အဆိုပါသင်တန်းကို စာသင်ခန်းတက်ရောက် (Face To Face) ဖြင့် နိုဝင်ဘာ ၂၈ ရက်မှ စ၍ (၂) လကြာ ဖွင့်လှစ်သင်ကြားမည်ဖြစ်ပြီး နေပြည်တော်ရှိ ပြည်ထောင်စုစာရင်းစစ်ချုပ်ရုံး သင်တန်းကျောင်းတွင် ပြည်ထောင်စုအဆင့်ဝန်ကြီးဌာန၊ အဖွဲ့အစည်းများမှ သင်တန်းသား ၁၈၀ ဦးနှင့် ရန်ကုန်တိုင်းဒေသကြီး၊ တိုက်ကြီးမြို့နယ်ရှိ ဗဟိုမြေစာရင်းဖွံ့ဖြိုးမှုလေ့ကျင့်ပညာပေးရေးသင်တန်းကျောင်းတွင် ၁၄၀ ဦး၊ စုစုပေါင်းသင်တန်းသား ၃၂၀ ဦး တက်ရောက်မည်ဖြစ်သည်။

သင်တန်းဖွင့်ပွဲအခမ်းအနားသို့ ဒုတိယစာရင်းစစ်ချုပ်၊ အမြဲတမ်းအတွင်းဝန်၊ ဒုတိယအမြဲတမ်းအတွင်းဝန်၊ ဒုတိယညွှန်ကြားရေးမှူးချုပ်များ၊ တာဝန်ရှိပုဂ္ဂိုလ်များ၊ သင်တန်းကထိကများနှင့် သင်တန်းသားများ တက်ရောက်ခဲ့ကြသည်။

ပြည်ထောင်စုစာရင်းစစ်ချုပ် ဦးတင်ဦးသည် တာဝန်ရှိသူများနှင့်အတူ ၂၉-၁၁-၂၀၂၂ ရက်နေ့ နံနက် ၉ နာရီခွဲတွင် ရန်ကုန်တိုင်းဒေသကြီး၊ အရှေ့ပိုင်းခရိုင်စာရင်းစစ်ရုံး၌  အရှေ့ပိုင်း ခရိုင်နှင့် ခရိုင်အတွင်းရှိ မြို့နယ်စာရင်းစစ်ရုံးများမှဝန်ထမ်းများနှင့် တွေ့ဆုံ၍ အမှာစကား ပြောကြားခဲ့သည်။

ထိုသို့ တွေ့ဆုံအမှာစကားပြောကြားရာတွင် ပြည်ထောင်စုစာရင်းစစ်ချုပ်ရုံးသည်  နိုင်ငံတော်ဘဏ္ဍာရန်ပုံငွေစီမံခန့်ခွဲသုံးစွဲရာတွင်  ပြည်သူများအတွက် ထိရောက်အကျိုးရှိစေရန် ဘဏ္ဍာရေးစာရင်း၊ လုပ်ငန်းဆောင်ရွက်မှုနှင့် ဥပဒေ၊ စည်းမျဉ်းစည်းကမ်းလိုက်နာမှုတို့ကို စစ်ဆေးလျက်ရှိပါကြောင်း၊ သို့ပါ၍ ဝန်ထမ်းများအနေဖြင့် စစ်ဆေးရေးအရည်အသွေးများ ပြည့်ဝနေစေရန်အတွက် သက်ဆိုင်ရာ ဥပဒေ၊ နည်းဥပဒေ၊ လုပ်ထုံးလုပ်နည်း၊ ညွှန်ကြားချက် များနှင့် ပြောင်းလဲတိုးတက်နေသည့် ပညာရပ်ဆိုင်ရာ ၊ နည်းပညာဆိုင်ရာများကို  စဉ်ဆက်မပြတ် လေ့လာနေရန် လိုအပ်ပါကြောင်း၊ သို့မှသာ မှန်ကန်သည့် စဉ်းစားတွေးခေါ်မှုမှတစ်ဆင့် မှန်ကန်သည့်ဆုံးဖြတ်ချက်များကို ချမှတ်နိုင်မည်ဖြစ်ပါကြောင်း၊ လုပ်ငန်းများအောင် မြင်စွာအကောင်အထည်ဖော်ဆောင်ရွက်နိုင်ရန်အတွက် ဒေသရုံးများ အနေဖြင့် စစဆေးရေးနှင့်စီမံရေးရာဆိုင်ရာ အရေးကြီးကိစ္စရပ်များကို အချိန်နှင့်တစ်ပြေးညီ အဆင့်ဆင့်တင်ပြ၍ ပူးပေါင်းဆောင်ရွက်ကြရမည်ဖြစ်ပါကြောင်း၊ ထို့ပြင် လုပ်ငန်းများဆောင်ရွက်ရာတွင် သတိသမ္မဇဉ်ထားရှိပြီး နိုင်ငံတော်အပေါ်သစ္စာစောင့်သိလျက် ကျင့်ဝတ်သိက္ခာနှင့်အညီ ပြည့်သူ့အကျိုးစီးပွားကို ဦးထိပ်ထား ဆောင်ရွက်ကြစေလိုပါကြောင်း လမ်းညွှန်မှာကြားခဲ့သည်။

ထို့နောက် ရန်ကုန်တိုင်းဒေသကြီး၊ အရှေ့ပိုင်းခရိုင်စာရင်းစစ်ရုံး၊ ဒုတိယညွှန်ကြားရေးမှူးနှင့် ခရိုင်အတွင်းရှိ မြို့နယ်စာရင်းစစ်ရုံးများမှ တာဝန်ခံအရာထမ်းများက လုပ်ငန်းဆောင် ရွက်မှုများနှင့်စပ်လျဉ်း၍ အသီးသီးရှင်းလင်းတင်ပြကြသည်။ ယင်းနောက် အမြဲတမ်းအတွင်းဝန် က တင်ပြချက်များနှင့်စပ်လျဉ်း၍ ထပ်မံဖြည့်စွက်ရှင်းလင်း တင်ပြမှုအပေါ် ပြည်ထောင်စု စာရင်းစစ်ချုပ်က လိုအပ်သည်များ ပေါင်းစပ်ညှိနှိုင်းဆောင်ရွက်ပေးခဲ့သည်။

ဆက်လက်၍ နံနက် ၁၁ နာရီတွင် ပြည်ထောင်စုစာရင်းစစ်ချုပ်သည် မြောက်ပိုင်း ခရိုင်စာရင်းစစ်ရုံး၌  မြောက်ပိုင်းခရိုင်နှင့် ခရိုင်အတွင်းရှိ မြို့နယ်စာရင်းစစ်ရုံးဝန်ထမ်းများနှင့် တွေ့ဆုံအမှာစကား ပြောကြားပြီး လုပ်ငန်းဆိုင်ရာတင်ပြမှုများအပေါ် လိုအပ်သည်များ ပေါင်းစပ်ညှိနှိုင်း ဖြည့်ဆည်းပေးခဲ့သည်။

မြန်မာနိုင်ငံစာရင်းကောင်စီဥက္ကဋ္ဌ ပြည်ထောင်စုစာရင်းစစ်ချုပ် ဦးတင်ဦးသည် ၂၈-၁၁-၂၀၂၂ ရက်နေ့ နံနက် ၁၀ နာရီတွင် မြန်မာနိုင်ငံစာရင်းကောင်စီရုံး အစည်းအဝေးခန်းမ၌ ကျင်းပသည့် မြန်မာနိုင်ငံစာရင်းကောင်စီ အလုပ်အမှုဆောင်အစည်းအဝေး (၁/၂၀၂၂) သို့ တက်ရောက်၍ အဖွင့်အမှာစကား ပြောကြားခဲ့သည်။

အစည်းအဝေးတွင် ပြည်ထောင်စုစာရင်းစစ်ချုပ် ဦးတင်ဦးက မြန်မာနိုင်ငံစာရင်းကောင်စီကို ၁၉၇၂ ခုနှစ်မှစတင်၍ နိုင်ငံ၏စီးပွားရေးဖွံ့ဖြိုးတိုးတက်မှုကို အထောက်အကူပြုနိုင်သည့် အရည်အချင်းပြည့်မီသော စာရင်းပညာရှင်နှင့် စာရင်းကျွမ်းကျင်သူများ တိုးပွားလာစေရန်၊ စာရင်းပညာရပ်များ ဖွံ့ဖြိုးတိုးတက်စေရန်နှင့် နိုင်ငံတကာစာရင်းကိုင်စံများနှင့်အညီ လိုက်နာကျင့်သုံးနိုင်စေရန် ရည်ရွယ်ပြီး  ဖွဲ့စည်းခဲ့သည်မှာ ၂၀၂၂ ခုနှစ်တွင် နှစ်( ၅၀) ပြည့်ပြီဖြစ်ပြီး မကြာခင်မှာ နှစ် (၅၀) ပြည့် ရွှေရတုအထိမ်းအမှတ်အခမ်းအနားကို ကျင်းပပြုလုပ်သွားမည် ဖြစ်ပါကြောင်း။

နိုင်ငံတော်၏ကဏ္ဍပေါင်းစုံ ပြုပြင်ပြောင်းလဲမှုများအရ စီးပွားရေးဖွံ့ဖြိုးတိုးတက်လာမှုနှင့်အတူ စာရင်းပညာရှင်များနှင့်စာရင်းကျွမ်းကျင်သူများ၏ အခန်းကဏ္ဍသည်လည်း လွန်စွာအရေးပါလာပါကြောင်း၊ စာရင်းကိုင်စံများနှင့်အညီ စာရင်းများကို စနစ်တကျ ထိန်းသိမ်းရေး၊ နိုင်ငံခြားသားစာရင်းပညာရှင်များနှင့် ရင်ဘောင်တန်းဆောင်ရွက်နိုင်ရေး၊ ကျင့်ဝတ်သိက္ခာစောင့်ထိန်းရေး၊ လုပ်ငန်းဆောင်ရွက်မှုများကို အများပြည်သူသို့ ပွင့်လင်းမြင်သာစွာ ထုတ်ဖော်ပြသနိုင်ရေးတို့အတွက် စာရင်းပညာရှင်နှင့်စာရင်းပညာတတ်ကျွမ်းသူများ၏ အရည်အချင်းနှင့် အရေအတွက် တိုးတက်ရန် လိုအပ်ပါကြောင်း။

ပုဂ္ဂလိကကဏ္ဍရှိ စာရင်းလုပ်ငန်းဆောင်ရွက်သူများနှင့် စာရင်းပညာရှင်များ လိုက်နာရမည့်ကျင့်ဝတ်များ၊ စည်းမျဉ်းစည်းကမ်းနှင့် လုပ်ထုံးလုပ်နည်းများချမှတ်ခြင်း၊ ထိန်းကျောင်းခြင်းနှင့်လမ်းညွှန်ခြင်းများအပြင် အများပြည်သူအကျိုးစီးပွားနှင့် သက်ဆိုင်သည့်အဖွဲ့အစည်းများ၊ အသေးစားနှင့်အလတ်စားလုပ်ငန်းများအား နိုင်ငံတကာဘဏ္ဍာရေးအစီရင်ခံခြင်းစံများ ကို လိုက်နာကျင့်သုံးနိုင်စေရန်အတွက် လိုအပ်သည်များကို ပံ့ပိုးကူညီပေးခြင်းနှင့် ထိန်း ကျောင်းခြင်းကိုလည်း ဆောင်ရွက်ကြရမည် ဖြစ်ပါကြောင်း။

ထို့အပြင် ကောင်စီသည် စာရင်းကိုင်များအပေါ် ငွေကြေးခဝါချမှုတိုက်ဖျက်ရေးဥပဒေပါ ပြဋ္ဌာန်းချက်များအရ ကြီးကြပ်ထိန်းကျောင်းခြင်းနှင့် လိုအပ်ပါက အရေးယူဆောင်ရွက်ခြင်းများကို ထိရောက်စွာဆောင်ရွက်နိုင်ရန်အတွက် ပတ်သက်ဆက်နွယ်သော အဖွဲ့အစည်းများနှင့် ပူးပေါင်းဆောင်ရွက်ရမည်ဖြစ်ပါကြောင်း၊ သို့ပါ၍ ကောင်စီအမှုဆောင်များအနေဖြင့် မြန်မာနိုင်ငံစာရင်းကောင်စီဥပဒေပါ လုပ်ငန်းတာဝန်များနှင့်အညီ နိုင်ငံ၏စီးပွားရေးနှင့် စီမံခန့်ခွဲရေးနယ်ပယ်ဖွံ့ဖြိုးတိုးတက်စေရေးအတွက် တက်ညီလက်ညီ ကြိုးပမ်းဆောင်ရွက်ပေးကြစေလိုကြောင်း တိုက်တွန်းပြောကြားခဲ့သည်။ 

ယင်းနောက် ကောင်စီအလုပ်အမှုဆောင်အဖွဲ့ဝင်များက ယခင်အစည်းအဝေး ဆုံးဖြတ်ချက်များအရ ဆောင်ရွက်ပြီးစီးမှု၊ ဆောင်ရွက်လျက်ရှိသည့် လုပ်ငန်းဆောင်ရွက်မှုနှင့် ဆက်လက်ဆောင်ရွက်မည့်လုပ်ငန်းတို့နှင့်စပ်လျဉ်း၍ အစီအစဉ်အတိုင်း ရှင်းလင်းတင်ပြခဲ့ကြပြီး ပြည်ထောင်စုစာရင်းစစ်ချုပ်က နိဂုံးချုပ်အမှာစကား ပြောကြားခဲ့သည်။

အစည်းအဝေးသို့ ဒုတိယစာရင်းစစ်ချုပ်က Online ဖြင့် တက်ရောက်ပြီး မြန်မာနိုင်ငံလက်မှတ်ရပြည်သူ့စာရင်းကိုင်များအသင်းဥက္ကဋ္ဌနှင့် မြန်မာနိုင်ငံစာရင်းကောင်စီ အလုပ်အမှုဆောင်အဖွဲ့ဝင်များ၊ အမြဲတမ်းအတွင်းဝန်၊ ဒုတိယအမြဲတမ်းအတွင်းဝန်၊ ဒုတိယညွှန်ကြားရေးမှူးချုပ် (စီမံရေးရာ၊ လေ့ကျင့်ရေးနှင့်သုတေသနဦးစီးဌာန) နှင့် တာဝန်ရှိသူများ တက် ရောက်ခဲ့ကြသည်။