ပြည်ထောင်စုစာရင်းစစ်ချုပ် ဉီးမော်သန်း ဦးဆောင်သည့် ညွှန်ကြားရေးမှူးချုပ် (စစ်ဆေးရေး ဦးစီးဌာန) နှင့် အဖွဲ့ဝင် (၁) ဦး၊ စုစုပေါင်း (၃) ဦးပါ ကိုယ်စားလှယ်အဖွဲ့သည် ၂၀၁၉ ခုနှစ်၊ နိုဝင်ဘာလ (၄)ရက်နေ့မှ (၇)ရက်နေ့အထိ မလေးရှားနိုင်ငံ၊ ကွာလာလမ်ပူမြို့၌ ကျင်းပခဲ့သောအရှေ့တောင်အာရှ နိုင်ငံများဆိုင်ရာစာရင်းစစ်ချုပ်ရုံးများအဖွဲ့၏ (၅) ကြိမ်မြောက် ထိပ်သီးအစည်းအဝေးသို့ တက်ရောက်ခဲ့ပါသည်။ အဆိုပါအစည်းအဝေးသို့ အရှေ့တောင်အာရှနိုင်ငံများမှ စာရင်းစစ်ချုပ်များ နှင့်ကိုယ်စားလှယ်များ၊ အခြားအလှူရှင်နိုင်ငံများမှ ကိုယ်စားလှယ်များလည်း တက်ရောက်ခဲ့ကြပါသည်။
အဆိုပါအစည်းအဝေးတွင် အဖွဲ့၏ အတွင်းရေးမှူးချုပ်ရုံး လုပ်ငန်းဆောင်ရွက်မှုအဖွဲ့အကြီးအကဲ၊ မဟာဗျူဟာစီမံချက်ရေးဆွဲရေးကော်မတီ၊ စည်းမျဉ်းနှင့်လုပ်ထုံးလုပ်နည်းကော်မတီ၊ အသိပညာမျှဝေရေးကော်မတီနှင့် လေ့ကျင့်ရေးကော်မတီတို့၏ ၂၀၁၈-၂၀၁၉ ခုနှစ်ကာလအတွင်းဆောင်ရွက်ခဲ့မှု များကို သက်ဆိုင်ရာများက အစီရင်ခံတင်ပြကြပြီး ၎င်းတို့အား အတည်ပြုခဲ့ပါသည်။ ယင်းအပြင် 2nd Revision of ASEANSAI Rules and Procedures၊ Upgraded ASEANSAI Guideline on Monitoring & Evaluation System နှင့် ASEANSAI Guideline on Audit of Public Procurement တို့ကိုလည်း အတည်ပြုနိုင်ခဲ့ကြပါသည်။
အဆိုပါအစည်းအဝေးတွင် မလေးရှားနိုင်ငံစာရင်းစစ်ချုပ်နှင့် ပြည်ထောင်စုစာရင်းစစ်ချုပ်တို့ အား ၂၀၂၀ မှ ၂၀၂၁ ခုနှစ်အထိကာလအတွက် အဖွဲ့၏ ဉက္ကဋ္ဌ နှင့် ဒုတိယဥက္ကဋ္ဌများ အဖြစ် ခန့်အပ် တာဝန်လွှဲအပ်ခဲ့ပြီး သက်ဆိုင်ရာကော်မတီအသီးသီး၏ ဉက္ကဋ္ဌများကိုလည်း ပြန်လည်အတည်ပြုခန့်ထားခဲ့ကြပါသည်။