စာရင်းနှင့် စာရင်းစစ်ဆိုင်ရာ စံချိန်စံညွှန်းများနှင့် ကျင့်ဝတ် စည်းမျဉ်း စည်းကမ်းများ လိုက်နာခြင်းအပေါ် လေ့လာချက် အစီရင်ခံစာ ထုတ်ပြန်ခြင်း အလုပ်ရုံဆွေးနွေးပွဲ

၁။ ပြည်ထောင်စု စာရင်းစစ်ချုပ်ရုံးနှင့်အတူ မြန်မာနိုင်ငံစာရင်းကောင်စီ၊ မြန်မာနိုင်ငံ လက်မှတ်ရ ပြည်သူ့စာရင်းကိုင်များ အသင်းနှင့် ကမ္ဘာ့ဘဏ်တို့ ပူးပေါင်း၍ စာရင်းနှင့် စာရင်းစစ်ဆိုင်ရာ စံချိန်စံညွှန်းများနှင့် ကျင့်ဝတ် စည်းမျဉ်းစည်းကမ်းများ လိုက်နာခြင်းအပေါ် လေ့လာချက် အစီရင်ခံစာ ထုတ်ပြန်ခြင်း အလုပ်ရုံဆွေးနွေးပွဲကို ရန်ကုန်မြို့ Park Royal ဟိုတယ်၌ ၂၀၁၇ ခုနှစ် ဇွန်လ (၁၆) ရက်နေ့က ကျင်းပပြုလုပ်ခဲ့ပါသည်။

၂။ အလုပ်ရုံ ဆွေးနွေးပွဲတွင် ပြည်ထောင်စု စာရင်းစစ်ချုပ် ဒေါက်တာဦးမော်သန်းနှင့် ကမ္ဘာ့ဘဏ်မှ Country Manager ဖြစ်သူ Mr. Abdoulaye Seck တို့က အဖွင့် အမှာစကားပြောကြားခဲ့ပါသည်။ ထို့နောက် မြန်မာနိုင်ငံ နှင့် နိုင်ငံတကာမှ စာရင်းပညာရပ် ဆိုင်ရာ ကျွမ်းကျင်ပညာရှင်များက Towards a stronger accounting profession ၊ Accounting Education: The catalyst to high quality accountants and Enhancing the quality of corporate financial reporting and auditing ခေါင်းစဉ်များ အပေါ် ၎င်းတို့၏ အမြင်များကို ပြန်လည်မျှဝေ ဆွေးနွေးခဲ့ကြပါသည်။ အစီရင်ခံစာတွင် စာရင်းနှင့် စာရင်းစစ်ဆိုင်ရာ အခြေခံ အဆောက်အအုံကို ပိုမိုတိုးမြှင့်ပေးရန် အကြုံပြုချက်များကို ဖော်ပြထားပါသည်။

၃။ အလုပ်ရုံ ဆွေးနွေးပွဲသို့ ပြည်ထောင်စု စာရင်းစစ်ချုပ်ရုံး၊ စီမံကိန်းနှင့် ဘဏ္ဍာရေးဝန်ကြီးဌာန၊ မြန်မာနိုင်ငံတော် ဗဟိုဘဏ်၊ မြန်မာနိုင်ငံစာရင်းကောင်စီ၊ မြန်မာနိုင်ငံ လက်မှတ်ရ ပြည်သူ့ စာရင်းကိုင်များအသင်း၊ ကမ္ဘာ့ဘဏ်၊ ငွေရေးကြေးရေး အဖွဲ့အစည်းများ၊ ရန်ကုန်စီးပွားရေး တက္ကသိုလ်၊ ကိုယ်ပိုင်စာရင်းကိုင် သင်တန်းကျောင်းများ နှင့် ပုဂ္ဂလိက ဘဏ်များမှ တာဝန်ရှိသူများလည်း တက်ရောက်ခဲ့ကြပါသည်။