ပြည်ထောင်စု စာရင်းစစ်ချုပ်ရုံးသည် “အရှေ့တောင် အာရှနိုင်ငံများအဖွဲ့ အဖွဲ့ဝင် နိုင်ငံများမှ ရွေးချယ်ထားသော စာရင်းစစ်ချုပ်ရုံးများ၏ အခန်းကဏ္ဍအား တိုးတက်စေခြင်း” နှင့် စပ်လျဉ်း၍ ဒေသဆိုင်ရာ စွမ်းရည်ဖွံ့ဖြိုး တိုးတက်ရေး နည်းပညာ အကူအညီအတွက် အစကနဦးနှင့် စီမံချက် ရေးဆွဲရေးဆိုင်ရာ အလုပ်ရုံဆွေးနွေးပွဲကို အာရှ ဖွံ့ဖြိုးရေးဘဏ်နှင့် ပူးပေါင်း ကျင်းပခဲ့ပါသည်။ အဆိုပါ အလုပ်ရုံဆွေးနွေးပွဲကို ၂၀၁၆ ခုနှစ်၊ ဇန်နဝါရီလ ၁၉ ရက်နေ့မှ ၂၂ ရက်နေ့အထိ ကျင်းပခဲ့ပြီး ပြည်ထောင်စု စာရင်းစစ်ချုပ်ရုံးမှ အရာရှိများ၊ ADB Project ဆောင်ရွက်နေသည့် ဝန်ကြီးဌာနများနှင့် အစိုးရဌာန အဖွဲ့အစည်းများမှ အရာရှိများ၊ ကမ္ဘာ့ဘဏ်နှင့် ဂျပန်နိုင်ငံ နိုင်ငံတကာ ပူးပေါင်း ဆောင်ရွက်ရေး အေဂျင်စီ (JICA) တို့မှ ကိုယ်စားလှယ်များ ပါဝင်ဆွေးနွေးခဲ့ကြပါသည်။
ADB နည်းပညာဆိုင်ရာ အကူအညီသည် ပြည်ထောင်စု စာရင်းစစ်ချုပ်ရုံးက ပြည်ထောင်စု စာရင်းစစ်ချုပ် ဥပဒေအရ လုပ်ငန်းများဆောင်ရွက်ရာတွင် စွမ်းဆောင်ရည် ပိုမိုအားကောင်းလာစေရေး၊ စာရင်းစစ်ချုပ်ရုံးများ၏ နိုင်ငံတကာ စာရင်းစစ်စံများကို ပိုမိုလိုက်နာ ကျင့်သုံးရေးနှင့် ပြည်သူ့ဘဏ္ဍာဆိုင်ရာ စာရင်းစစ်ဆေးရေး၌ ပိုမိုကောင်းမွန်သော အရည်အသွေး ရရှိရေးတို့အတွက် ပါဝင်ကူညီပေးရန် ရည်မှန်းထားပါသည်။
ယင်းနည်းပညာဆိုင်ရာ အကူအညီအား ဂျပန်နိုင်ငံအစိုးရ၏ ဆင်းရဲမှုလျှော့ချရေးဆိုင်ရာ ဂျပန်နိုင်ငံ ရန်ပုံငွေအဖွဲ့မှ ငွေကြေးထောက်ပံ့မှုနှင့်အတူ အာရှဖွံ့ဖြိုးရေးဘဏ်မှ ၂၀၁၄ ခုနှစ်၊ ဒီဇင်ဘာလတွင် သဘောတူခွင့်ပြုခဲ့ပြီး ဖြစ်ပါသည်။ ဖိလစ်ပိုင်နိုင်ငံ၊ ဗီယက်နမ်နိုင်ငံနှင့် လာအိုနိုင်ငံမှ စာရင်းစစ်ချုပ်ရုံးများသည်လည်း အဆိုပါ ဒေသဆိုင်ရာ စွမ်းရည် ဖွံ့ဖြိုးရေးနည်းပညာအကူအညီ (R-CDTA) တွင် ပါဝင်ပါသည်။