ပြည်ထောင်စုစာရင်းစစ်ချုပ်ရုံး
သတင်းထုတ်ပြန်ချက်
ရက်စွဲ ၊ ၂၀၁၉ ခုနှစ် နိုဝင်ဘာလ (၂၉ )ရက်
၁။ ၂၀၁၉ ခုနှစ်၊ နိုဝင်ဘာလ (၂၉)ရက်နေ့ နံနက် ၉း၀၀ နာရီ၌ မြန်မာနိုင်ငံစာရင်း ကောင်စီရုံး သင်တန်းကျောင်းခန်းမ ၊ ရန်ကုန်မြို့တွင် ၂၀၁၉ - ၂၀၂၀ ပညာသင်နှစ် ဒီပလိုမာစာရင်းကိုင် (ပထမပိုင်း) သင်တန်း အမှတ်စဉ်-၄၀ သင်တန်းဆင်းပွဲ အခမ်းအနား ကျင်းပခဲ့ရာ မြန်မာနိုင်ငံစာရင်းကောင်စီဥက္ကဌ၊ ပြည်ထောင်စုစာရင်းစစ် ချုပ် တက်ရောက်၍ သင်တန်းဆင်းလမ်းညွှန်အမှာစကားပြောကြားခဲ့ပါသည်။
၂။ အဆိုပါအခမ်းအနားသို့ ရန်ကုန်တိုင်းဒေသကြီးစာရင်းစစ်ချုပ်၊ ပြည်ထောင်စု စာရင်းစစ်ချုပ်ရုံးမှ အမြဲတမ်းအတွင်းဝန် ၊ မြန်မာနိုင်ငံစာရင်းကောင်စီအလုပ်အမှု ဆောင်အဖွဲ့ဝင်များ ၊ သင်တန်းကထိကများ ၊ သင်တန်းသား ၊ သင်တန်းသူများနှင့် မြန်မာနိုင်ငံစာရင်းကောင်စီရုံးမှ တာဝန်ရှိသူများတက်ရောက်ကြပါသည်။
၃။ အခမ်းအနားတွင် မြန်မာနိုင်ငံစာရင်းကောင်စီဥက္ကဌ၊ ပြည်ထောင်စုစာရင်းစစ် ချုပ်က အောက်ပါအတိုင်း လမ်းညွှန်မှာကြားခဲ့ပါသည်-
- မိမိတို့နိုင်ငံတော်တွင် ကဏ္ဍပေါင်းစုံပြုပြင်ပြောင်းလဲမှုများအရ စီးပွားရေး ဖွံ့ဖြိုးတိုးတက်လာခြင်းနှင့်အတူ စာရင်းပညာရှင်များ၊ စာရင်းပညာတတ် ကျွမ်းသူများ၏ အခန်းကဏ္ဍမှာအရေးပါသည့်အနေအထားတွင် ရှိနေပါ ကြောင်း။
- စီးပွားရေးလုပ်ငန်းများတွင် ခေတ်မီစာရင်းကိုင်စံများနှင့်အညီ စာရင်း များကို စနစ်တကျထိန်းသိမ်းရေး၊ နိုင်ငံခြားသားစာရင်းပညာရှင်များနှင့် ရင်ဘောင်တန်းလုပ်ကိုင်နိုင်ရေး ၊ ကျင့်ဝတ်သိက္ခာစောင့်ထိန်းရေးတို့အတွက် စာရင်းပညာရှင်နှင့် စာရင်းပညာတတ်ကျွမ်းသူများ၏ အရည်အချင်းနှင့် အရေအတွက် တိုးတက်လာရန် လိုအပ်ပါကြောင်း၊
- မြန်မာနိုင်ငံစာရင်းကောင်စီအနေဖြင့် ဒီပလိုမာစာရင်းကိုင်သင်တန်းအတွက် ယခင်က ဝင်ခွင့်စာမေးပွဲဖြင့် ရွေးချယ်တက်ရောက်စေခဲ့ခြင်းအား အသိအမှတ် ပြုတက္ကသိုလ်တစ်ခုခုမှ ဘွဲ့တစ်ခုရရှိထားသူများကို တိုက်ရိုက်တက်ရောက် ခွင့်ပေးခြင်းဖြင့် လည်းကောင်း၊ လက်မှတ်ရပြည်သူ့စာရင်းကိုင်သင်တန်းသို့ ယခင်က စီးပွားရေးတက္ကသိုလ်မှ B.Com ဘွဲ့ရ ၊ အမှတ်များသည့် Fresh Graduate များကိုသာ တက်ရောက်ခွင့်ပေးခဲ့ခြင်းအား စီးပွားရေးတက္ကသိုလ်မှ B.Com ၊ B.Act ၊B.B.A ဘွဲ့ရရှိသူများ၊ မြန်မာနိုင်ငံစာရင်းကောင်စီမှ ပေးအပ်သော ဒီပလိုမာစာရင်းကိုင်လက်မှတ်ရရှိထားသူများ၊ ဘွဲ့တစ်ခုခုရရှိပြီး ACCA Fundamental - Skill Level ပြီးစီးသူများနှင့် CIMA Diploma in Management Accounting ပြီးစီးသူများအား တိုက်ရိုက်တက်ရောက် ခွင့်ပေးခြင်းဖြင့်လည်းကောင်း၊ ဘွဲ့တစ်ခုခုရရှိထားပြီး စာရင်းပညာဆိုင်ရာ အခြားသင်တန်းတက်ရောက်ထားသူများအား ဝင်ခွင့်စားမေးပွဲကျင်းပပေးခြင်း ဖြင့်လည်းကောင်း ဖြေလျှော့ပေးလျက်ရှိပါကြောင်း ။
- စာမေးပွဲတွင် အောင်အမှတ်အနေဖြင့် အမှတ်(၄၀)သတ်မှတ်ထားပါကြောင်း၊ ဖြေဆိုမည့်ဘာသာရပ် (၅)ခုတွင် ဘောဂဗေဒ၊ စာရင်းကိုင်ပညာ၊ စီးပွားရေး သင်္ချာစာရင်းအင်း ဘာသာရပ်တို့ကို Module 1 ၊ ကူးသန်းရောင်းဝယ်မှု ဗဟုသုတ ၊ စီးပွားရေးဥပဒေ ဘာသာရပ်တို့ကို Module 2 အနေနဲ့ သတ်မှတ်ထားပြီး ကနဦးဖြေဆိုချိန်မှာ သက်ဆိုင်ရာဘာသာရပ်အားလုံး ဖြေဆိုကြရမည်ဖြစ်ကြောင်း။
- Module တစ်ခုထဲမှာ ဘာသာရပ်အားလုံးအောင်မြင်ပြီး အခြား Module တစ်ခုထဲမှာ ဘာသာရပ်တစ်ခုခုကျရှုံးခဲလျှင် Module တစ်ခုအောင်မြင်သည်ဟု သတ်မှတ်ကြောင်း၊ ကျရှုံးသည့် Moduleထဲမှ ဘာသာရပ်အားလုံးအား တစ်ဆက်တည်း ၃ ကြိမ်အထိ ပြန်လည်ဖြေဆိုခွင့်ပြုထားပြီး အောင်မြင်မှုမရှိခဲ့ ရင်ဖြစ်စေ၊ စာမေးပွဲဝင်ရောက်ဖြေဆိုခြင်းမရှိလျှင်ဖြစ်စေ ကနဦးစာမေးပွဲ ဖြေဆိုတဲ့အတိုင်း ဘာသာရပ်အားလုံးကို ပြန်လည်ဖြေဆိုရမည်ဖြစ်ကြောင်း။
- ကျရှုံးတဲ့ Module မှာပါဝင်သည့် ဘာသာရပ်တိုင်း ၂၀ မှတ်အနည်းဆုံးရရှိပြီး ၃ ဘာသာပေါင်းရမှတ်မှာ ၇၅ မှတ်ရရှိမှသာ ကျန် Pass ဖြစ်ထားသော Module ကို အောင်မြင်သည်ဟု သတ်မှတ်ကြောင်း၊
- စာရင်းပညာရှင်များနှင့် စာရင်းပညာတတ်ကျွမ်းသူအရေအတွက် များများ လိုအပ်သော်လည်း အရည်အသွေးကို လျှော့ချမည်မဟုတ်ကြောင်း ၊ သင်တန်း ဆင်းသင်တန်းသား/ သူများအနေဖြင့် စာမေးပွဲကို ကောင်းမွန်စွာဖြေဆိုပြီး အရည်အချင်းပြည့်ဝသည့် ကျင့်ဝတ်သိက္ခာနှင့်ပြည့်စုံသော စာရင်းပညာတတ် ကျွမ်းသူများအဖြစ်မှ စာရင်းပညာရှင်များအဖြစ်ရောက်ရှိအောင် ကြိုးပမ်း ကြရန်ဖြစ်ကြောင်း၊
၄။ သင်တန်းဆင်းပွဲအခမ်းအနားကို နံနက် ၉ း ၃၀ နာရီတွင် ရုပ်သိမ်းခဲ့ပါသည်။
