ပြည်ထောင်စုစာရင်းစစ်ချုပ် ဦးမော်သန်း မန္တလေးတိုင်းဒေသကြီး၊ ညောင်ဦးခရိုင်အတွင်းရှိ ခရိုင်၊ မြို့နယ်စာရင်းစစ်ရုံးဝန်ထမ်းများနှင့်တွေ့ဆုံ

 

ပြည်ထောင်စုစာရင်းစစ်ချုပ်သည် မန္တလေးတိုင်းဒေသကြီးစာရင်းစစ်ချုပ်၊ ပြည်ထောင်စုစာရင်းစစ်ချုပ်ရုံး အမြဲတမ်းအတွင်း၀န်နှင့် မန္တလေးတိုင်းဒေသကြီးစာရင်းစစ်ချုပ်ရုံးမှ ညွှန်ကြားရေးမှူးတို့ လိုက်ပါလျက် ၁၅-၉-၂၀၁၉ ရက်နေ့တွင် မန္တလေးတိုင်း‌‌ဒေသကြီး၊ ညောင်ဦးခရိုင်/ မြို့နယ်နှင့် ကျောက်ပန်းတောင်းမြို့နယ်များရှိ စာရင်းစစ်၀န်ထမ်းများနှင့်တွေ့ဆုံ၍ လုပ်ငန်းဆိုင်ရာကိစ္စရပ်များ လမ်းညွှန်မှာကြားခဲ့ပါသည်။

ရှေးဦးစွာပြည်ထောင်စုစာရင်းစစ်ချုပ်မှ နိုင်ငံတကာမှာရှိသော Supreme Audit Institution-SAI များသည် Financial Audit, Compliance Audit, Performance Audit အပြည့်အဝ လုပ်ဆောင်ကြရကြောင်း၊ မြန်မာနိုင်ငံမှာလည်း နိုင်ငံတကာ SAI များလုပ်ဆောင်ရသည့်အတိုင်း အပြည့်အ၀ဆောင်ရွက်ရသည့်အတွက် နိုင်ငံတကာအဆင့်မီကြောင်း၊ ဝန်ထမ်းများအနေဖြင့်လည်း လုပ်ကိုင်ရသောနယ်ပယ် ကျယ်ပြန့်လာခြင်းကို စိုးရိမ်ကြောင့်ကြရန်မလိုကြောင်း၊ Performance Audit သည်လည်း အဓိကအားဖြင့် ပြည်သူ့အသုံးစရိတ် စီမံခန့်ခွဲရာတွင် လမ်းကြောင်းတည့်မတ် ပေးရခြင်းဖြစ်ကြောင်း၊ ပြည်သူ့အသုံးစရိတ်သည် တန်ရာတန်ကြေး Value for money ရရှိမှုကို ပြည်သူများကမျှော်မှန်းကြသည့်အတွက် အသုံးစရိတ်ကို Economy၊ Efficiency၊ Effectiveness (3Es)ဖြင့် ဆန်းစစ်ကြရန်လိုအပ်ကြောင်း၊ Performance Audit စစ်ဆေးရာတွင်လည်း အနှစ်ချုပ်အားဖြင့် ဝန်ထမ်းနှင့်ပတ်သက်၍ ပေးအပ်ထားသောတာဝန်နှင့် လုပ်ငန်းလုပ်ကိုင်ဆောင်ရွက်မှုတို့ ကိုက်ညီမှုရှိမရှိ၊ ပိုင်ဆိုင်ထားသောပစ္စည်းများနှင့်ပတ်သက်၍ သုံးစွဲမှုသည် ထိရောက်မှုရှိမရှိ၊ အထူးသဖြင့် စီမံကိန်းများသည် ရည်ရွယ်ချက် ပေါက်မြောက်မှုရှိမရှိ စစ်ဆေးခြင်းသာဖြစ်ကြောင်း၊ မြေပြင်ရှိသောအခြေအနေနှင့် စစ်ဆေးသည့်အခါ ဖော်ပြထားသော အခြေအနေများ ကိုက်ညီမှု ရှိမရှိသည်လည်း အရေးကြီးသောအချက်ဖြစ်ကြောင်း၊ Financial Audit၊ Compliance Audit၊ Performance Audit လမ်းညွှန်ချက်များရှိကြောင်း၊ မိမိတို့ စာရင်းစစ်ချုပ်ရုံးသက်တမ်းနှစ် ၇၀ ကျော် စစ်ဆေးရေးသမိုင်းတလျှောက်တွင်လည်း လုပ်ငန်းစစ်ဆေးရေး ပါ၀င်ခဲ့သောကြောင့် ယခင်လုပ်ငန်း တာဝန်အတိုင်း ပြန်လည်လုပ်ကိုင်ခွင့်ရခြင်းဖြစ်သည့်အတွက် စိုးရိမ်ကြောင့်ကြစရာမရှိကြောင်း၊ လုပ်ပိုင်ခွင့်အပြည့်အဝရရှိသည့်အတွက် ဝမ်းသာမိကြောင်း ပြောကြားခဲ့ပါသည်။

ဆက်လက်၍ ပြည်ထောင်စုစာရင်းစစ်ချုပ်မှ လုပ်ငန်းဆောင်ရွက်ရာတွင် ပညာရှင် ကျင့်ဝတ်များဖြစ်သော သတိ၊ သမ္ပစဉ်နှင့် လုံလဝီရိယ ( Due, Care and Deligent ) ထားရှိရန်၊ တွေ့ရှိချက်များကို ပွင့်လင်းမြင်သာမှုရှိရမည်ဆိုသော်လည်း ဉပဒေအရ မဖြစ်မနေမှသာထုတ်ဖော်ပြောဆိုရန်၊ သက်ဆိုင်ရာစစ်ဆေးသည့်အဖွဲ့အစည်း၏ ခွင့်ပြုချက်ရယူပြီးမှသာ ထုတ်ဖော်ပြောဆိုရန်၊ လျှို့ဝှက်ထားရှိမှု (Confidentiality) ကိုလိုက်နာရန်၊ နောက်ဆုံးအချက်အနေဖြင့် ဤရုံး၏ “ပြည်သူ့ဘဏ္ဍာစီမံခန့်ခွဲမှု တိုးတက်ကောင်းမွန်စေရေးထိန်းကျောင်းပေး” ဆောင်ပုဒ်နှင့်အညီ စနစ်ကောင်းအပေါ် လမ်းကြောင်း အမှန်တည့်မတ်ပေးရန် တာဝန်ရှိကြောင်း၊ ပညာရှင်ကျင့်ဝတ်များနှင့် ကိုက်ညီမည်ဆိုလျှင် ပြည်သူလူထုက ယုံကြည်မှုရှိလာမည်၊ စစ်ဆေးရသည့် အဖွဲ့အစည်းများ၏ လေးစားမှုရှိလာမည်ဖြစ်ကြောင်း မှာကြားခဲ့ပါသည်။

ပြည်ထောင်စုစာရင်းစစ်ချုပ်မှ နိဂုံးချုပ်အားဖြင့် ဝန်ထမ်းမိသားစုများနှင့် တွေ့ဆုံရသည့်အတွက် ဝမ်းသာပါကြောင်း၊ စိတ်ကောင်းနှလုံးကောင်းထားရန်၊ ဘုရားဟောတရားတော်များနှင့်အညီ နေထိုင်ရန်၊ ဝန်ထမ်းများ စည်းစည်းလုံးလုံး လုပ်ကိုင်ဆောင်ရွက်သွားရန် လမ်းညွှန်မှာကြားခဲ့ပါသည်။

မန္တလေးတိုင်းဒေသကြီးစာရင်းစစ်ချုပ်မှ စစ်ဆေးရေးလုပ်ငန်း ဆောင်ရွက်မှုအခြေအနေများ၊ ဝန်ထမ်းပိုင်းဆိုင်ရာ အခြေအနေများကို တင်ပြဆွေးနွေးခဲ့ပြီး၊ ဝန်ထမ်းများအတွက် လမ်းညွှန်မှာကြားမှုများကို အထူးကျေးဇူးတင်ရှိပါကြောင်း၊ ဝန်ထမ်းများ၏ ကြိုးစားအားထုတ်မှုများဖြင့် တိုးတက်အောင်မြင်အောင် ဆက်လက်ဆောင်ရွက်သွားမည်ဖြစ်ကြောင်း ပြောကြားခဲ့ပါသည်။

ယင်းနောက် ပြည်ထောင်စုစာရင်းစစ်ချုပ်ရုံး အမြဲတမ်းအတွင်းဝန်မှ ဝန်ထမ်းများကို အားထားကြောင်း၊ အရည်အသွေးပြည့်ပြည့်ဝဝ၊ ကိုယ်ကျင့်တရားပြည့်ပြည့်ဝဝဖြင့် ဓမ္မဓိဌာန်ကျကျ ဆောင်ရွက်ရန်လိုကြောင်း၊ HR Management၊ Asset Management နှင့် Project Management များကို လမ်းညွှန်ချက်များနှင့်အညီ ဆန်းစစ်ရန်၊ စာရင်းစစ်အန္တရာယ်ကင်းရှင်းအောင် ဂရုစိုက် ပြုမှုဆောင်ရွက်ကြရန်ဖြစ်ကြောင်း၊ မိမိတာဝန်ကိုသာ မှန်ကန်ကျေပွန်စွာဆောင်ရွက်ရန်၊ လုပ်ငန်း လုပ်ဆောင်ချက်များ တိုးတက်ကောင်းမွန်သည်ထက် ကောင်းမွန်အောင်ဆောင်ရွက်ရန်၊ ပြောင်းလဲသောခေတ်စနစ်နှင့်အညီ မိမိတို့၏ စစ်ဆေးရေး၊ စီမံခန့်ခွဲမှုဆိုင်ရာ စွမ်းရည်ပြည့်စုံစေရန် အစဉ်လေ့လာမှတ်သားမှုများ ပြုလုပ်ရန်လိုအပ်ကြောင်း၊ ဝန်ထမ်းရာထူးတိုးကိစ္စ၊ အပြောင်းအရွှေ့ ကိစ္စများနှင့်စပ်လျဉ်း၍ စီမံခန့်ခွဲမှုဘုတ်အဖွဲ့အနေဖြင့် အကောင်းဆုံးဖြစ်စေရေး ဆောင်ရွက်ပေးလျက်ရှိကြောင်း မှာကြားခဲ့ပါသည်။