ဦးစီးအရာရှိများမွမ်းမံသင်တန်း အမှတ်စဉ် (၃/၂၀၁၉) သင်တန်းဆင်းပွဲ အခမ်းအနား

ပြည်ထောင်စုစာရင်းစစ်ချုပ်ရုံး

သတင်းထုတ်ပြန်ချက်

၂၀၁၉ ခုနှစ်၊ စက်တင်ဘာလ ၃၀ ရက်

၁။        ၂၀၁၉ ခုနှစ်၊ စက်တင်ဘာလ ၂၈ ရက်နေ့ နံနက်ပိုင်း ၁၀ : ၃၀ နာရီ၌ ပြည်ထောင်စု စာရင်းစစ်ချုပ်ရုံး၊ စုပေါင်းခန်းမတွင် ဦးစီးအရာရှိများမွမ်းမံသင်တန်း အမှတ်စဉ် (၃/၂၀၁၉) သင်တန်းဆင်းပွဲ အခမ်းအနားကျင်းပခဲ့ရာ ပြည်ထောင်စုစာရင်းစစ်ချုပ် ဦးမော်သန်းတက်ရောက်၍ သင်တန်းဆင်းလမ်းညွှန်အမှာစကား ပြောကြားခဲ့ပါသည်။

၂။       အဆိုပါအခမ်းအနားသို့ ပြည်ထောင်စုစာရင်းစစ်ချုပ်ရုံးမှ တာဝန်ရှိပုဂ္ဂိုလ်များ၊ သင်တန်းကထိကများနှင့် သင်တန်းသူ / သင်တန်းသား ၁၂၂ ဦး တက်ရောက်ခဲ့ကြပါသည်။

၃။      အခမ်းအနားတွင် ပြည်ထောင်စုစာရင်းစစ်ချုပ် ဦးမော်သန်းက အောက်ပါအတိုင်း လမ်းညွှန်မှာကြားခဲ့ပါသည် -

  • ပြည်ထောင်စုစာရင်းစစ်ချုပ်ဥပဒေပါ ပြဋ္ဌာန်းချက်များအရ ပြည်ထောင်စုစာရင်းစစ်ချုပ်ရုံး၏ တာဝန်ရှိမှု အခန်းကဏ္ဍပိုမိုကျယ်ပြန့်လာကြောင်း၊
  • ပြည်ထောင်စုစာရင်းစစ်ချုပ်ရုံး၏ တာဝန်ရှိမှုအပိုင်း ပို၍ကျယ်ပြန့်လာသည်နှင့်အညီ အကောင်အထည်ဖော်သူများ၏ လုပ်ငန်းစွမ်းဆောင်ရည် ခိုင်မာအားကောင်းရေးသည် အဓိကကျအရေးပါသည်ကို သတိချပ်ရမည် ဖြစ်ကြောင်း၊
  • “လူ့စွမ်းအားအရင်းအမြစ် တိုးတက်အားကောင်းရေး၊ စာရင်းပညာတိုးတက်ပြန့်ပွားရေး” နှင့် “လက်တွေ့လုပ်ငန်းမှာ အကျိုးရှိရှိပြန်လည် အသုံးချနိုင်ရေး” ရည်ရွယ်ချက်များဖြင့် သင်တန်းများဖွင့်လှစ်ပို့ချပေးလျက်ရှိကြောင်း၊
  • လက်တွေ့ဆောင်ရွက်ခဲ့သည့် စစ်ဆေးရေးလုပ်ငန်းများ၏ အတွေ့အကြုံများကို အခြေခံ၍ နိုင်ငံတကာတွင် ကျင့်သုံးလျက်ရှိသည့် အလေ့အထများ နှင့် နှိုင်းယှဉ်ကာ အကြောင်းအရာစုံလင်စွာဖြင့် ပို့ချဆွေးနွေးပေးခဲ့ကြောင်း၊
  • ဌာန / အဖွဲ့အစည်းများသည် ချမှတ်ထားသည့်မူဝါဒကို အကောင်အထည် ဖော်ရာတွင် သက်ဆိုင်ရာ ဥပဒေ၊ စည်းမျဉ်းစည်းကမ်း၊ လုပ်ထုံးလုပ်နည်းများမှ  သွေဖည်မှုမရှိစေရေး ထိန်းကျောင်းရန်တာဝန်ရှိကြောင်း၊
  • ပညာရပ်ပိုင်းဆိုင်ရာတွင် စာရင်းစစ်ဆေးခြင်းဆိုင်ရာ ကျွမ်းကျင်မှုသာမက ဦးဆောင်မှု ( Leadership )၊ စီမံအုပ်ချုပ်မှု ( Management ) နှင့် ပူးပေါင်း ဆောင်ရွက်မှု ( Cooperation ) ပုံစံများနှင့် အခြားသိသင့်သိထိုက်သော ဗဟုသုတများကို ရှာဖွေဖတ်ရှုဆည်းပူးရမည်ဖြစ်ကြောင်း၊
  • Compliance Audit, Performance Audit, Financial Audit ဘာသာရပ်များကို လက်တွေ့ဆောင်ရွက်လျက်ရှိပြီး IT Audit အတွက်လည်း  နည်းပညာပိုင်း သီးခြားကျွမ်းကျင်မှုများကို ကိုယ်တိုင်ဆည်းပူးလေ့လာသည့်အပြင် မိမိဝန်ထမ်းများလေ့လာရန် တိုက်တွန်းအားပေးရမည်ဖြစ်ကြောင်း၊
  • ပြည်ထောင်စုစာရင်းစစ်ချုပ်ရုံး၏ ၅ နှစ် မဟာဗျူဟာစီမံချက်တွင်ပါရှိသော ရှေ့လုပ်ငန်းစဉ်များ၊ လက်ရှိအကောင်အထည်ဖော်နေမှုများ၊ ရှေ့ကာလ အခင်းအကျင်း အစီအမံများကို ချမှတ်ထားသည့် ရည်မှန်းချက်နှင့်အညီ အောင်မြင်စွာဆောင်ရွက်ရန် စာရင်းစစ်ရုံးဝန်ထမ်းများအားလုံး တာဝန်ရှိသည်ကို သိရှိနားလည်ရန်လိုကြောင်း၊
  • ဝန်ထမ်းကျင့်ဝတ်သိက္ခာကို စောင့်ထိန်းကြရန်၊ နိုင်ငံဖွံ့ဖြိုးရေးအတွက် ကျရာအခန်းကဏ္ဍမှ အုတ်တစ်ချပ်၊ သဲတစ်ပွင့်အနေဖြင့် ပါဝင်ကြိုးပမ်းကြရန် တိုက်တွန်းမှာကြားလိုပါကြောင်း။

၄။      သင်တန်းဆင်းပွဲအခမ်းအနားကို နံနက်ပိုင်း ၁၁ : ၀၀ နာရီတွင် ရုပ်သိမ်း၍  အခမ်းအနားတက်ရောက်လာသူများကို  နေ့လယ်စာဖြင့် ဧည့်ခံကျွေးမွေးခဲ့ပါသည်။