ပြည်ထောင်စုစာရင်းစစ်ချုပ်ရုံး
သတင်းထုတ်ပြန်ချက်
၂၀၁၉ ခုနှစ်၊ ဇူလိုင်လ ( ၁ ) ရက်နေ့
၁။ ၂၀၁၉ ခုနှစ်၊ ဇူလိုင်လ ( ၁ ) ရက်နေ့ နံနက် ( ၉ : ၀၀ ) နာရီအချိန်တွင် ပြည်ထောင်စုစာရင်းစစ်ချုပ်ရုံး၊ စုပေါင်းခန်းမ၌ စာရင်းစစ် - ၃ များ လုပ်ငန်းခွင်ကျွမ်းကျင်မှုသင်တန်း အမှတ်စဉ်-၄၉ သင်တန်းဖွင့်ပွဲ အခမ်းအနားကျင်းပခဲ့ရာ ပြည်ထောင်စုစာရင်းစစ်ချုပ် တက်ရောက်၍ သင်တန်းဖွင့်လမ်းညွှန်အမှာစကား ပြောကြားခဲ့ပါသည်။
၂။ အဆိုပါအခမ်းအနားသို့ ပြည်ထောင်စုစာရင်းစစ်ချုပ်ရုံးမှ အမြဲတမ်းအတွင်းဝန် ၊ ညွှန်ကြားရေးမှူးချုပ်နှင့် တာဝန်ရှိပုဂ္ဂိုလ်များ၊ သင်တန်းကထိကများနှင့် သင်တန်းသူ / သင်တန်းသား (၁၀၁) ဦး တက်ရောက်ခဲ့ပါသည်။
၃။ အခမ်းအနားတွင် ပြည်ထောင်စုစာရင်းစစ်ချုပ်က အောက်ပါအတိုင်း လမ်းညွှန်မှာကြားခဲ့ပါသည် -
- ယခုဖွင့်လှစ်သော သင်တန်းသည် စာရင်းစစ် - ၃ များအတွက် လုပ်ငန်းခွင်ကျွမ်းကျင်မှု သင်တန်းဖြစ်၍ အရေးကြီးသော သင်တန်းဖြစ်ကြောင်း၊
- စာရင်းစစ် - ၃ များသည် အခြေခံစာရင်းပညာ သင်ယူတတ်မြောက်ပြီးသူများဖြစ်ကြသော်လည်း လုပ်ငန်းခွင်တွင် လက်တွေ့ကျကျ ထိထိရောက်ရောက် တာဝန်ထမ်းဆောင်နိုင်ရန် ကျွမ်းကျင်မှုများ လိုအပ်နေသေးသည့်အတွက် ကျွမ်းကျင်သင်တန်းများ ဖွင့်လှစ်ရခြင်းဖြစ်ကြောင်း၊
- စာရင်းစစ် - ၃ များသည် နိုင်ငံပိုင်ကဏ္ဍစာရင်းစစ်များ (Public Sector Auditors) ဖြစ်ကြသဖြင့် ပြည်ထောင်စုစာရင်းစစ်ချုပ်ဥပဒေအရ အပ်နှင်းထားသော စာရင်းစစ်ဆေးခြင်းလုပ်ငန်းတာဝန်များကို ကျေပွန်စွာထမ်းဆောင် ကြရမည်ဖြစ်ကြောင်း၊
- ယခုသင်တန်းတွင် စာရင်းစစ်ဆေးခြင်းဆိုင်ရာ အခြေခံသဘောတရားများ၊ အခြေခံစာရင်းပညာများ၊ စာရင်းစစ်ဆေးရာတွင် ကျင့်သုံးရမည့် စည်းမျဉ်းစည်းကမ်းများ၊ ဘဏ္ဍာရေးစည်းမျဉ်းများ၊ ဝန်ထမ်းစည်းမျဉ်းများနှင့် စောင့်ထိန်းရမည့် ကျင့်ဝတ်များစသည့် စာရင်းစစ်များ သိသင့်သိထိုက်သည်များကို ပို့ချပေးသွားမှာဖြစ်ကြောင်း၊
- လုပ်ငန်းခွင်တွင် လက်တွေ့အသုံးချရမည့် ဗဟုသုတ၊ ပညာများကို ပို့ချပေးခြင်းဖြစ်၍ ပို့ချသည့်သင်ခန်းစာများအားလုံး ကျေညက်ဖို့လိုကြောင်း၊
- အများနှင့်မတူသော အရည်အချင်းရှိရန် ဉာဏ်ရည်ထက်မြက်မှု ( Intelligent Quotient )၊ ရှေ့မြော်မြင်သည့်အမြင်ရှိမှု ( Vision Quotient )၊ နည်းပညာပိုင်းဆိုင်ရာကျွမ်းကျင်မှုနှင့် ကျင့်ဝတ်သိက္ခာပိုင်းဆိုင်ရာမြင့်မားမှု ( Technical Skill and Ethics Quotient )၊ တီထွင်ဖန်တီးနိုင်မှု ( Creative Quotient )၊ သတင်းအချက်အလက်နည်းပညာဆိုင်ရာကျွမ်းကျင်မှု ( Digital Quotient )၊ အတွေ့အကြုံရှိမှု ( Experience Quotient ) နှင့် အရေးကြီးဆုံးအချက်ဖြစ်သော စိတ်ခံစားမှုဆိုင်ရာတည်ငြိမ်မှု ( Emotional Quotient ) စသည့် Quotient (၇) ချက်နှင့် ပြည့်စုံအောင် ကြိုးစားဖို့ လိုအပ်ကြောင်း၊
- မိမိ၏ အထက်အကြီးအကဲက မိမိအပေါ် မျှော်လင့်သော အားကိုးအားထား ပြုနိုင်မှု(Reliability) ၊ အပေါင်းလက္ခဏာဆောင်သောအမြင်ရှိမှု(Positivism) ၊ တိုးတက်အောင်မြင်အောင် လုပ်ကိုင်လိုသော ဆန္ဒရှိမှု (Ambition) ၊ ကြိုးစားအားထုတ်မှု (Applicataion) နှင့် အဖွဲ့အစည်းအပေါ်သစ္စာရှိမှု (Loyalty) အချက်များကိုလည်း ဖြည့်ဆည်းနိုင်အောင် ကြိုးစားကြရန် မှာကြားလိုကြောင်း၊
- သင်တန်းတွင် ပို့ချခဲ့သည်များကို ပြန်လည်ဆန်းစစ်သော စာမေးပွဲဖြေဆိုကြရမှာဖြစ်သဖြင့် ကြိုးစားလေ့လာသင်ယူကြစေလိုပြီး နိုင်ငံအတွက် အားကိုးရသော စာရိတ္တကောင်းမွန်သော ဝန်ထမ်းကောင်းများဖြစ်ရေး ကြိုးပမ်းကြဖို့ တိုက်တွန်းမှာကြားလိုပါကြောင်း။
၄။ သင်တန်းဖွင့်ပွဲအခမ်းအနားကို နံနက် ( ၉ : ၃၀ ) နာရီတွင် ရုပ်သိမ်းခဲ့ပါသည်။