ဦးစီးအရာရှိများမွမ်းမံသင်တန်းအမှတ်စဉ် (၁/၂၀၁၉) သင်တန်းဖွင့်ပွဲအခမ်းအနား

ပြည်ထောင်စုစာရင်းစစ်ချုပ်ရုံး

သတင်းထုတ်ပြန်ချက်

၂၀၁၉ ခုနှစ်၊ မေလ (၂၁) ရက်

၁။        ၂၀၁၉ ခုနှစ်၊ မေလ (၂၁ ) ရက်နေ့နံနက် ၉ : ၀၀ နာရီ၌ ပြည်ထောင်စုစာရင်းစစ်ချုပ်ရုံး၊ စုပေါင်းခန်းမ တွင် ဦးစီးအရာရှိများမွမ်းမံသင်တန်းအမှတ်စဉ် (၁/၂၀၁၉) ဖွင့်ပွဲအခမ်းအနားကျင်းပခဲ့ရာ ပြည်ထောင်စု စာရင်းစစ်ချုပ် ဦးမော်သန်းတက်ရောက်၍ သင်တန်းဖွင့်လမ်းညွှန်အမှာစကား ပြောကြားခဲ့ပါသည်။

၂။         အဆိုပါအခမ်းအနားသို့ ပြည်ထောင်စုစာရင်းစစ်ချုပ်ရုံးမှ တာဝန်ရှိပုဂ္ဂိုလ်များ၊ သင်တန်းကထိကများနှင့် သင်တန်းသား/ သင်တန်းသူ (၈၃) ဦး တက်ရောက်ခဲ့ကြပါသည်။

၃။        အခမ်းအနားတွင် ပြည်ထောင်စုစာရင်းစစ်ချုပ်က အောက်ပါအတိုင်း လမ်းညွှန်မှာကြားခဲ့ပါသည်-

  • စာရင်းစစ်ဆေးခြင်း၏ ရည်ရွယ်ချက်မှာ အဖွဲ့အစည်းများ၏ လုပ်ငန်းဆောင်ရွက်ချက်များသည် နိုင်ငံတော်နှင့်ပြည်သူအတွက် မည်သည့်အတိုင်းအတာပမာဏအထိ အကျိုးသက်ရောက်မှု ရှိ မရှိ စိစစ်သုံးသပ်နိုင်အောင် စစ်ဆေးခြင်းဖြစ်သည်ကို သိရှိနားလည်ထားရမည်ဖြစ်ကြောင်း၊
  • ဌာနအဖွဲ့အစည်းများသည် ပြည်သူ့ဘဏ္ဍာငွေကိုသုံးစွဲ၍ လုပ်ငန်းများဆောင်ရွက်ရာ၌ အကျိုးရှိမှု၊ ထိရောက်မှု၊  စီမံခန့်ခွဲမှုဆိုင်ရာများနှင့်ချမှတ်ထားသည့်လုပ်ငန်းစနစ်များတွင် အားနည်းချက်များ ရှိ မရှိ မှန်မှန်ကန်ကန် ရှုမြင်သုံးသပ်ဖို့လိုအပ်ကြောင်း၊
  • ခေတ်စနစ်အရ တိုးတက်ပြောင်းလဲလျက်ရှိသော ဥပဒေ၊ နည်းဥပဒေ၊ လုပ်ထုံးလုပ်နည်း၊ စည်းမျဉ်းများကို လက်လှမ်းမီသိရှိနိုင်ရေး မပြတ်ဖြည့်ဆည်းကြမှသာ ပို၍ ထိထိရောက်ရောက် လုပ်ကိုင်ဆောင်ရွက်နိုင်မည်ဖြစ်ကြောင်း၊
  • မိမိတို့အဖွဲ့အစည်း၏ လုပ်ငန်းတစ်ခုတည်းကိုသာ ကျွမ်းကျင်မှုရှိရုံမျှသာမက ဆက်စပ်အဖွဲ့ အစည်းများ၏ ပြောင်းလဲလာမှုများကိုလည်း သိရှိနားလည်ရန်လိုအပ်ကြောင်း၊
  • ဤရုံး၏ “ပြည်သူ့ဘဏ္ဍာစီမံခန့်ခွဲမှု တိုးတက်ကောင်းမွန်စေရေး ထိန်းကျောင်းပေး” ဟူသော ဆောင်ပုဒ်နှင့်အညီ ဌာနအဖွဲ့အစည်းများ၏ လုပ်ငန်းဆောင်ရွက်မှုများတွင် စည်းမျဉ်းမကျနမှု၊ ဌာနတွင်းကြီးကြပ်ကွပ်ကဲမှု အားနည်းချက်များ တွေ့ရှိပါက  အပြုအသဘောဝေဖန်ထောက်ပြ ခြင်း၊ မျှတသောရှုထောင့်အမြင်ဖြင့်အကြံပြုခြင်း ဆောင်ရွက်ပေးရန်လိုကြောင်း၊
  • ဤသင်တန်းတွင် ပြည်ထောင်စုစာရင်းစစ်ချုပ် ဥပဒေဆိုင်ရာပြဋ္ဌာန်းချက်များ၊ ပြည်ထောင်စု အခွန်ကောက်ဆိုင်ရာ သိမှတ်ဖွယ်ရာများ၊ အမျိုးသားစီမံကိန်း၊ Budget စစ်ဆေးခြင်း၊ Project စစ်ဆေးခြင်းအပါအဝင် နိုင်ငံတကာတွင်ကျင့်သုံးနေသော နိုင်ငံတကာ နိုင်ငံပိုင်ကဏ္ဍ စာရင်းစစ် စံများ (IPSAS)၊ ISSAI ဘာသာရပ်များကို ပို၍ ပြည့်ပြည့်စုံစုံ ပို့ချသွားရန် စီမံထားကြောင်း၊
  • ဦးစီးအရာရှိများအနေဖြင့် ပြည်သူ့ဝန်ထမ်းများဖြစ်သည့်အားလျော်စွာ နိုင်ငံတော်နှင့်ပြည်သူ့ အကျိုးအတွက် အလုပ်ကိုရိုးသားကြိုးစားလုပ်ကိုင်ကြရန်၊ ပြည်သူ့အကျိုးစီးပွား တိုးတက်စေရေး အတွက် ကျရာတာဝန်ကို ကျေပွန်စွာထမ်းဆောင်ခြင်းဖြင့် အလုပ်အကျွေးပြုကြရန် လိုအပ်ကြောင်း၊

၄။        သင်တန်းဖွင့်ပွဲအခမ်းအနားကို နံနက်   ၉း ၃၀  နာရီတွင် ရုပ်သိမ်းခဲ့ပါသည်။