ပြည်ထောင်စုစာရင်းစစ်ချုပ်ရုံးနှင့်နော်ဝေနိုင်ငံစာရင်းစစ်ချုပ်ရုံးတို့ပူးပေါင်း၍ ပတ်ဝန်းကျင်ဆိုင်ရာစာရင်းစစ်ဆေးခြင်း အလုပ်ရုံဆွေးနွေးပွဲကျင်းပခြင်း

၁။ ပြည်ထောင်စုစာရင်းစစ်ချုပ်ရုံးနှင့် နော်ဝေနိုင်ငံစာရင်းစစ်ချုပ်ရုံးတို့ပူးပေါင်း၍ ပတ်ဝန်းကျင်ဆိုင်ရာစာရင်းစစ်ဆေးခြင်း (Environmental Audit) အလုပ်ရုံဆွေးနွေးပွဲကို ပြည်ထောင်စုစာရင်းစစ်ချုပ်ရုံး၊ နေပြည်တော်၌ ၂၀၁၉ ခုနှစ် ဖေဖော်ဝါရီလ (၁၉) ရက်နေ့မှ (၂၀) ရက်နေ့အထိ ကျင်းပပြုလုပ်ခဲ့ပါသည်။

၂။ အလုပ်ရုံဆွေးနွေးပွဲတွင် နော်ဝေနိုင်ငံစာရင်းစစ်ချုပ်ရုံးမှ ကျွမ်းကျင်ပညာရှင်များက နိုင်ငံတကာစာရင်းစစ်ချုပ်ရုံးများ၏စံများ (International Standards of Supreme Audit Institutions - ISSAI) နှင့်အညီ ပတ်ဝန်းကျင်ဆိုင်ရာစာရင်းစစ်ဆေးခြင်းကို အဓိပ္ပါယ်ဖွင်‌့ဆိုပုံ၊ အခြေခံသဘောတရားများ၊ သီအိုရီနှင့်ချမှတ်ထားသည့်မူဘောင်များ၊ သက်ဆိုင်ရာစာရင်းစစ်စံများနှင့် လမ်းညွှန်ချက်များစသည့် အချက်များအပေါ် ရှင်းလင်းပြောကြားခဲ့ပြီးလုပ်ငန်းဆောင်ရွက်မှုစာရင်းစစ်ဆေးခြင်းတွင်ပတ်ဝန်းကျင်ဆိုင်ရာရှုထောင့်အမြင်နှင့်ဆက်စပ်စစ်ဆေးမှု၊ စဉ်ဆက်မပြတ်ဖွံ့ဖြိုးတိုးတက်မှုပန်းတိုင်များ (SDGs) နှင့်Environmental Audit တို့ဆက်နွယ်ပုံ၊ Environmental Audit ဆောင်ရွက်ရာ၌ ကြိုတင်ပြင်ဆင်ခြင်း (Planning) အဆင့်တွင် စာရင်းစစ်အန္တရာယ်အကဲဖြတ်ခြင်းနှင့် စိစစ်သုံးသပ်ခြင်း (Risk Assessment and Analysis)၊Design ရေးဆွဲခြင်း၊ Audit Criteria သတ်မှတ်ခြင်း၊ သတင်းအချက်အလက်များနှင့် ၎င်းတို့ကိုရရှိနိုင်သည့်အရင်းအမြစ်များ၊နော်ဝေနိုင်ငံနှင့် ယူဂန်ဒါနိုင်ငံတွင် စစ်ဆေးခဲ့သည့်အတွေ့အကြုံများ၊ မြန်မာနိုင်ငံတွင် အဓိကဖြစ်ပွားနေသည့် ပတ်ဝန်းကျင်ဆိုင်ရာခြိမ်းခြောက်မှုများ၊Environmental Audit ဆောင်ရွက်ရာတွင် ဆက်စပ်စစ်ဆေးရမည့်တာဝန်ရှိသောဌာနအဖွဲ့အစည်းများနှင့် လိုက်နာကျင့်သုံးရမည့်ဥပဒေ၊စည်းမျဉ်းစည်းကမ်းများသတ်မှတ်ခြင်းစသည်တို့ကို ဆွေးနွေးခဲ့ပါသည်။ထို့ပြင် တက်ရောက်သူများ၏ အတွေ့အကြုံများနှင့် မေးမြန်းချက်များအပေါ် ၎င်းတို့၏အမြင်များကိုလည်း ပြန်လည်မျှဝေခဲ့ကြပါသည်။

၃။ အလုပ်ရုံဆွေးနွေးပွဲကျင်းပခြင်းဖြင့် တက်ရောက်သူများသည် ISSAI နှင့်အညီ Environmental Audit ဆောင်ရွက်ပုံများ၊ Environmental Audit ၏ အရေးပါအရာရောက်ပုံ၊စစ်ဆေးမည့်အကြောင်းအရာရွေးချယ်ပုံ၊ သက်ဆိုင်ရာ ကဏ္ဍများကို မည်ကဲ့သို့စစ်ဆေး၍ စာရင်းစစ်အစီရင်ခံစာတွင် မည်သို့ထည့်သွင်းဖော်ပြပေးရမည်စသည်များကို သိရှိရခြင်းဖြင့်အသိအမြင်၊ ဗဟုသုတတိုးပွားကာEnvironmental Audit ဆောင်ရွက်ရာတွင် အထောက်အကူပြုမည်ဖြစ်ပါသည်။

၄။အလုပ်ရုံဆွေးနွေးပွဲသို့ပြည်ထောင်စုစာရင်းစစ်ချုပ်ရုံးမှအမြဲတမ်းအတွင်းဝန်၊ညွှန်ကြားရေးမှူးချုပ်(စစ်ဆေးရေးဦးစီးဌာန)နှင့်ဒုတိယညွှန်ကြားရေးမှူးချုပ်များ၊ နော်ဝေနိုင်ငံစာရင်းစစ်ချုပ်ရုံးမှ ကျွမ်းကျင်ပညာရှင်များ၊ ပြည်ထောင်စုစာရင်းစစ်ချုပ်ရုံး၊တိုင်းဒေသကြီး/ပြည်နယ်စာရင်းစစ်ချုပ်ရုံးများနှင့်ဒေသစာရင်းစစ်ရုံးအဆင့်ဆင့်မှ အရာထမ်း၊ အမှုထမ်းများ စုစုပေါင်း (၇၈) ဦး တက်ရောက်ခဲ့ကြပါသည်။