၁။ မြန်မာနိုင်ငံ၏ ဘဏ်လုပ်ငန်းကဏ္ဍတွင် နိုင်ငံတကာဘဏ္ဍာရေးအစီရင်ခံခြင်းစံ (International Financial Reporting Standards - IFRS) နှင့် နိုင်ငံတကာစာရင်းစစ်စံ (International Standards on Auditing - ISA) တို့ကို အကောင်အထည်ဖော် လိုက်နာဆောင်ရွက်နိုင်ရေးအတွက် နောက်ထပ်အကျိုးတူပူးပေါင်းဆောင်ရွက်မှုများ ပြုလုပ်နိုင်ရန် ပြည်ထောင်စုစာရင်းစစ်ချုပ်ရုံးနှင့် ဂျာမန်နည်းပညာပူးပေါင်းဆောင်ရွက်ရေးအဖွဲ့ (GIZ) တို့သည် ၂၀၁၈ ခုနှစ်၊ နိုဝင်ဘာလ (၆) ရက်နေ့တွင် ပြည်ထောင်စုစာရင်းစစ်ချုပ်ရုံး၊ နေပြည်တော်၌ နားလည်မှုစာချွန်လွှာကို လက်မှတ်ရေးထိုးခဲ့ကြပါသည်။
၂။ အဆိုပါ လက်မှတ်ရေးထိုးပွဲအခမ်းအနားသို့ ပြည်ထောင်စုစာရင်းစစ်ချုပ်၊ အမြဲတမ်း အတွင်းဝန်၊ ညွှန်ကြားရေးမှူးချုပ် (စစ်ဆေးရေးဦးစီးဌာန)၊ ဒုတိယအမြဲတမ်းအတွင်းဝန်၊ ဒုတိယ ညွှန်ကြားရေးမှူးချုပ်များနှင့်တာဝန်ရှိသူများ တက်ရောက်ခဲ့ကြပါသည်။
၃။ နားလည်မှုစာချွန်လွှာကို ပြည်ထောင်စုစာရင်းစစ်ချုပ်ရုံးမှ ကိုယ်စားလှယ်များအဖြစ် ပြည်တွင်းပြည်ပဆက်ဆံရေးနှင့်သတင်းပြန်ကြားရေးဌာနခွဲမှ ညွှန်ကြားရေးမှူး ဒေါ်စီစီချိန် နှင့် ဒုတိယညွှန်ကြားရေးမှူး ဦးအေးငွေ တို့ကလည်းကောင်း၊ GIZ ဘက်မှ မြန်မာနိုင်ငံဘဏ်လုပ်ငန်း နှင့်ဘဏ္ဍာရေးကဏ္ဍဖွံ့ဖြိုးတိုးတက်ရေးစီမံကိန်း (BFSD) ၏ Program Director ဖြစ်သူ Mr. Armin Hofmann နှင့် Program Manager ဖြစ်သူ Mr. Anthony Deary တို့ကလည်းကောင်း အသီးသီး လက်မှတ်ရေးထိုးခဲ့ကြပါသည်။
၄။ နားလည်မှုစာချွန်လွှာသည် မြန်မာနိုင်ငံဘဏ်လုပ်ငန်းကဏ္ဍ၌ IFRS နှင့် ISA တို့အား အကောင်အထည်ဖော်လိုက်နာဆောင်ရွက်နိုင်အောင် အထောက်အကူပြုရန် ရည်ရွယ်ပြီး GIZ မှ ပြည်ထောင်စုစာရင်းစစ်ချုပ်ရုံးအား IFRS နှင့် ISA တို့ကို လက်ခံကျင့်သုံး အကောင်အထည်ဖော် ဆောင်ရွက်ရေးအတွက် နည်းပညာအကူအညီပေးရန်၊ ဘဏ်လုပ်ငန်းကဏ္ဍတွင် ဘဏ္ဍာရေး အစီရင်ခံခြင်းစံများ အကောင်အထည်ဖော်ရေးကော်မတီ (Banking Sector Financial Reporting Standards Implementation Committee - BFRIC) နှင့် မြန်မာနိုင်ငံဆိုင်ရာ မဟာဗျူဟာနှင့် လုပ်ငန်းစီမံချက် (Country Strategy and Action Plan - CSAP) ဆိုင်ရာ စတင်ဆောင်ရွက်မှုများ ကို ထောက်ပံ့ကူညီပေးရန် ဖြစ်ပါသည်။