ပြည်ထောင်စုစာရင်းစစ်ချုပ်ရုံးနှင့် နော်ဝေနိုင်ငံစာရင်းစစ်ချုပ်ရုံးတို့ ပူးပေါင်း၍ Performance Audit Workshop ကျင်းပခြင်း

၁။ ပြည်ထောင်စုစာရင်းစစ်ချုပ်ရုံးနှင့် နော်ဝေနိုင်ငံ စာရင်းစစ်ချုပ်ရုံးတို့ ပူးပေါင်း၍ လုပ်ငန်း အကောင်အထည်ဖော် ဆောင်ရွက်မှုစစ်ဆေးခြင်း အလုပ်ရံုံဆွေးနွေးပွဲ (Performance Audit Workshop) ကို ပြည်ထောင်စုစာရင်းစစ်ချုပ်ရုံး၊ နေပြည်တော်၌ ၂၀၁၇ ခုနှစ်၊ အောက်တိုဘာလ (၂) ရက်နေ့မှ (၃) ရက်နေ့အထိ ကျင်းပပြုလုပ်ခဲ့ပါသည်။

၂။ အလုပ်ရုံ ဆွေးနွေးပွဲတွင် နော်ဝေနိုင်ငံ စာရင်းစစ်ချုပ်ရုံးမှ ကျွမ်းကျင်ပညာရှင်က အလုပ်ရုံဆွေးနွေးပွဲ ကျင်းပရခြင်း ရည်ရွယ်ချက်များ၊ Performance Audit အမျိုးအစား (၃) မျိုးနှင့် စာရင်းစစ်ဆေးခြင်း ကြိုတင်ပြင်ဆင်ရာတွင် အသုံးပြုသည့် Audit Design Matrix များ၊ နိုင်ငံတကာ စာရင်းစစ်ချုပ်ရုံးများ၏ စံများ (International Standards of Supreme Audit Institutions, ISSAIs) တွင် ဖော်ပြထားသော Performance Audit ဆောင်ရွက်ရခြင်း၏ အဓိက ရည်ရွယ်ချက်များအပေါ် ယေဘုယျ ရှင်းလင်းပေးခြင်း၊ လက်တွေ့ ဥပမာ အနေဖြင့် နော်ဝေနိုင်ငံ စာရင်းစစ်ချုပ်ရုံးက “Performance Audit on Hospitals” စစ်ဆေးရာတွင် ဆောင်ရွက်ခဲ့သည့် နည်းလမ်း၊ တွေ့ရှိချက်များနှင့် အစီရင်ခံစာတွင် ဖော်ပြသည့် အကြံပြုချက်များ၊ စစ်ဆေးမှုရလဒ်များကို ဆွေးနွေးခြင်း၊ ပြည်ထောင်စု စာရင်းစစ်ချုပ်ရုံးက Pilot Audit အဖြစ် ဆောင်ရွက်သည့် Performance Audit Areas (၇) ခုနှင့် စပ်လျဉ်း၍ စစ်ဆေးရခြင်း ရည်ရွယ်ချက်၊ တွေ့ရှိချက်များ၊ ကောင်းမွန်သည့် အတွေ့အကြုံများ၊ အခက်အခဲများ အပေါ် အပြန်အလှန်ဆွေးနွေးခြင်း၊ လိုအပ်ချက်များကို အကြံပြုခြင်းနှင့် ကျွမ်းကျင်သူများ၏ အတွေ့ အကြုံများအရ တက်ရောက်သူများ၏ မေးမြန်းချက်များအပေါ် ၎င်းတို့၏အမြင်များကို ပြန်လည် မျှဝေခဲ့ကြပါသည်။

၃။ အလုပ်ရုံဆွေးနွေးပွဲ ကျင်းပခြင်းဖြင့် တက်ရောက်သူများသည် ISSAIs Framework နှင့် အညီ Performance Audit ဆောင်ရွက်ပုံများနှင့် နိုင်ငံတကာအတွေ့အကြုံများကို လက်တွေ့ စစ်ဆေးချက် နမူနာလေ့လာရခြင်းဖြင့် သိရှိရခြင်း၊ Performance Audit ဆောင်ရွက်ရာတွင် ပိုမိုအာရုံစိုက်သင့်သည့် ပြဿနာ နယ်ပယ်များ၊ အခက်အခဲများ၊ ဖြေရှင်းနိုင်ဖွယ်ရှိသည့် နည်းလမ်းများ သိရှိရခြင်းဖြင့် အဆိုပါ အသိအမြင်၊ ဗဟုသုတများကို လက်တွေ့လုပ်ငန်းတွင် အကျိုးရှိရှိ အသုံးချနိုင်မည်ဖြစ်ပါသည်။ အလုပ်ရုံ ဆွေးနွေးပွဲသို့ နော်ဝေနိုင်ငံ စာရင်းစစ်ချုပ်ရုံးမှ ကျွမ်းကျင်ပညာရှင်၊ ပြည်ထောင်စုစာရင်းစစ်ချုပ်ရုံးနှင့် နေပြည်တော်ကောင်စီ နယ်မြေအတွင်း ရှိ စာရင်းစစ်ရုံးများမှ အရာထမ်း၊ အမှုထမ်း စုစုပေါင်း (၁၁၅) ဦး တက်ရောက်ခဲ့ကြပါသည်။