၁။      European Union Trust Fund နှင့် ကမ္ဘာ့ဘဏ်၏ နည်းပညာအကူအညီတို့ဖြင့် ပြည်ထောင်စုစာရင်းစစ်ချုပ်ရုံး ၊စီမံကိန်းနှင့်ဘဏ္ဍာရေးဝန်ကြီးဌာနတို့ ပူးပေါင်း၍ “Myanmar Public Sector Accounting Conference” ကို ၂၀၁၉ ခုနှစ်၊ သြဂုတ်လ ၁၂ ရက် နေ့၊ နံနက် ၈:၃၀ နာရီမှ ညနေ ၅:၀၀ နာရီအထိ နေပြည်တော်၊ Hilton Hotel တွင် ကျင်းပခဲ့ပါသည်။ ယင်း Conference ကို အစိုးရဌာနအဖွဲ့အစည်းများက စာရင်းစံများ၏  အရေးပါမှုအား သတိပြုမိစေရန် ရည်ရွယ်ကျင်းပခြင်းဖြစ်ပါသည်။

၂။  အခမ်းအနားတွင် ပထမဦးစွာ ပြည်ထောင်စုစာရင်းစစ်ချုပ်နှင့် စီမံကိန်းနှင့်ဘဏ္ဍာရေးဝန်ကြီးဌာန ပြည်ထောင်စုဝန်ကြီးတို့က အဖွင့်အမှာစကား ပြောကြားကြပါသည်။ထို့နောက် မြန်မာနိုင်ငံ၏ ပြည်သူ့ကဏ္ဍစာရင်းရေးသွင်းစနစ် ပြုပြင်ပြောင်းလဲရေးအခြေအနေများ၊ နိုင်ငံတကာပြည်သူ့ကဏ္ဍစာရင်းစံ (International Public Sector Accounting Standards – IPSAS) သို့ကူးပြောင်းရာတွင် အဓိကအကျိုးသက်ရောက်သည့်အချက်များ၊ IPSAS ကို လက်ခံကျင့်သုံးနေပြီဖြစ်သော နိုင်ငံ (၂) နိုင်ငံ၏ အတွေ့အကြုံများနှင့် ပုဂ္ဂလိကကဏ္ဍတွင် နိုင်ငံတကာဘဏ္ဍာရေးအစီရင်ခံခြင်းစံများသို့ ကူးပြောင်းဆောင်ရွက်မှု အခြေအနေများကို ကမ္ဘာ့ဘဏ်နှင့် နိုင်ငံတကာစာရင်းပညာရှင်များ ၊ သက်ဆိုင်ရာအဖွဲ့အစည်း/လုပ်ငန်းနယ်ပယ်များမှ ပညာရှင် ၁၃ ဦးတို့က အသီးသီးပါဝင်ဆွေးနွေးခဲ့ကြပြီး တက်ရောက်လာသူ ဌာနဆိုင်ရာအဖွဲ့ အစည်းများမှ တာဝန်ရှိသူများက ဆွေးနွေးမေးမြန်းခဲ့ကြပါသည်။

၃။      နိဂုံးချုပ်မိန့်ခွန်းကို စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်း မှ ပြောကြားခဲ့ပါသည်။

၄။ အဆိုပါအခမ်းအနားသို့ ပြည်ထောင်စုအဆင့်အစိုးရဌာနအဖွဲ့အစည်းများမှ အကြီးအကဲများ၊ ဝန်ကြီးများ၊ ဒုဝန်ကြီးများနှင့် တာဝန်ရှိသူများ၊ ဖွံ့ဖြိုးမှုမိတ်ဖက်အဖွဲ့အစည်းများမှ ကိုယ်စားလှယ်များ၊ မြန်မာနိုင်ငံစာရင်းကောင်စီ၊ မြန်မာနိုင်ငံ လက်မှတ်ရပြည်သူ့စာရင်းကိုင်များအသင်း၊ မြန်မာနိုင်ငံဘဏ်များအသင်း၊ ကုန်သည်များနှင့်စက်မှုလက်မှုလုပ်ငန်းရှင်များအသင်း၊ ပုဂ္ဂလိကဘဏ်များနှင့် မြန်မာ့အာမခံလုပ်ငန်းတို့မှ တာဝန်ရှိသူများ တက်ရောက်ခဲ့ကြပါသည်။

၁။        ပြည်ထောင်စုစာရင်းစစ်ချုပ်ရုံး (၁၃)ကြိမ်မြောက် ဝါဆိုသင်္ကန်းဆက်ကပ်လှူဒါန်းပွဲကို  ၂၀၁၉ ခုနှစ်၊ ဇူလိုင်လ ၁၅   ရက်နေ့ ၊ နံနက် ၁၀:၀၀ နာရီတွင် ဤရုံး၊ စုပေါင်းခန်းမ၌  ကျင်းပပြုလုပ်ခဲ့ပါသည်။

၂။  အဆိုပါဝါဆိုသင်္ကန်းဆက်ကပ်လှူဒါန်းပွဲသို့ ပျဉ်းမနားမြို့၊ ဘုရားကြီးကျောင်းတိုက်နှင့် ရတနာဘုမ္မိသာရကျောင်းတိုက်များရှိှ သံဃာတော်အရှင်သူမြတ်များ ကြွရောက်တော်မူကြပြီး ပြည်ထောင်စုစာရင်းစစ်ချုပ် ဦးမော်သန်းနှင့် ပြည်ထောင်စုစာရင်းစစ်ချုပ်ရုံးဝန်ထမ်းများက ဝါဆိုသင်္ကန်းနှင့်တကွ လှူဖွယ်ပစ္စည်းအစုစုတို့ကို ဆက်ကပ်လှူဒါန်းကြပါသည်။

၃။    ယင်းနောက် ပြည်ထောင်စုစာရင်းစစ်ချုပ်နှင့်တကွ ရုံးဝန်ထမ်းများသည် သံဃာတော်အရှင်သူမြတ်များထံမှ ငါးပါးသီလခံယူဆောက်တည်ကြပြီး အနုမောဒနာတရားနာယူ၍ ရေစက်သွန်းချအမျှဝေကြပြီးနောက် သံဃာတော်များအား နေ့ဆွမ်းဆက်ကပ်လှူဒါန်းကာ ရုံးဝန်ထမ်းများအား မုန့်ဟင်းခါးဖြင့် ဧည့်ခံကျွေးမွေးပါသည်။

       ပြည်ထောင်စုစာရင်းစစ်ချုပ်ရုံး၏ မိုးရာသီသစ်ပင်စိုက်ပျိုးပွဲကို ၁၈-၇-၂၀၁၉ရက်နေ့ နံနက် ၁၀:၀၀နာရီက ကျင်းပခဲ့ရာ ပြည်ထောင်စုစာရင်းစစ်ချုပ် ဦးမော်သန်း တက်ရောက်၍ မဟော်ဂနီပင်၊အုန်းပင် စိုက်ပျိုးပေးခဲ့ပါသည်။အမြဲတမ်းအတွင်းဝန်၊ ညွှန်ကြားရေမှူးချုပ်၊ ဒုတိယညွှန်ကြားရေးမှူးချုပ်များနှင့် ဝန်ထမ်းများကလည်း နှစ်ရှည်ပင်များဖြစ်သည့် ကျွန်းပင်၊ ပျဉ်းကတိုးပင်နှင့် မဟော်ဂနီပင်(၁၀၀)ပင်နှင့် အုန်းပင်၊ ကီလိုမာလကာပင်၊ သံပုရာပင်၊ စိန်တလုံးသရက်ပင်၊ ပိန္နဲပင် စုစုပေါင်း (၁၄၆)ပင် စိုက်ပျိုးပေးခဲ့ပါသည်။