ပြည်ထောင်စုစာရင်းစစ်ချုပ်ရုံး၊ နေပြည်တော်သင်တန်းကျောင်းတွင် ဖွင့်လှစ်သည့် လက်ထောက်ညွှန်ကြားရေးမှူးများ လုပ်ငန်းစွမ်းဆောင်ရည်မြှင့်တင်ရေး မွမ်းမံသင်တန်း၊ အမှတ်စဉ် (၃/၂၀၂၂) သင်တန်းဖွင့်ပွဲအခမ်းအနားကို ၁၂-၁၂-၂၀၂၂ ရက်နေ့ နံနက် ၉ နာရီခွဲတွင် နေပြည်တော်ရှိ ပြည်ထောင်စုစာရင်းစစ်ချုပ်ရုံး၊ စုပေါင်းခန်းမ၌ ကျင်းပရာ ဒုတိယစာရင်းစစ်ချုပ် ဒေါ်နိုင်သက်ဦး တက်ရောက်၍ သင်တန်းဖွင့်အမှာစကား ပြောကြားခဲ့သည်။
သင်တန်းဖွင့်ပွဲအခမ်းအနားတွင် ဒုတိယစာရင်းစစ်ချုပ်က ယခုသင်တန်းကို အများလက်ခံကျင့်သုံးလျက်ရှိသည့် စာရင်းစစ်စံ (Generally Accepted Auditing Standard-GAAS) မှ စာရင်းစစ်ချုပ်ရုံးများလိုက်နာရမည့် နိုင်ငံတကာစံ (International Standards of Supreme Audit Institutions - ISSAIs) သို့ ကူးပြောင်းဆောင်ရွက်ရာတွင် နိုင်ငံတကာစံများကို သိရှိနားလည်ပြီး စနစ်တကျ လိုက်နာဆောင်ရွက်နိုင်ရန်၊ တာဝန်ယူမှု၊ တာဝန်ခံမှုရှိသည့် စစ်ဆေးရေးစွမ်းဆောင်ရည်မြင့်မားစွာဖြင့် အရည်အသွေးပြည့်ဝသော စစ်ဆေးတွေ့ရှိချက်အစီရင်ခံစာများ ထုတ်ပြန်မှုတွင် ပိုမိုအထောက်အကူပြုနိုင်ရန်နှင့် တိုင်းဒေသကြီး/ ပြည်နယ်၊ ဒေသရုံးများတွင် ဆင့်ပွားသင်တန်းများ ပြန်လည်ပို့ချနိုင်ရန် ရည်ရွယ်၍ ဖွင့်လှစ်ရခြင်းဖြစ်ပါကြောင်း။
ပြည်ထောင်စုစာရင်းစစ်ချုပ်ရုံးသည် “ပြည်သူ့ဘဏ္ဍာစီမံခန့်ခွဲမှု တိုးတက်ကောင်းမွန်စေရေးထိန်းကျောင်းပေး” ဟူသော ဆောင်ပုဒ်နှင့်အညီ ခွင့်ပြုဘဏ္ဍာရန်ပုံငွေများကို လေလွင့်ဆုံးရှုံးမှုမရှိစေရေးနှင့် စနစ်တကျစီမံခန့်ခွဲသုံးစွဲစေရေးတို့အတွက် စစ်ဆေးခြင်းဖြင့် ထိန်းကျောင်းပေးလျက်ရှိပါကြောင်း၊ သို့ပါ၍ လုပ်ငန်းတာဝန်များဆောင်ရွက်ရာတွင် ပြည်သူ့အတွက် ထိရောက်အကျိုးရှိသည့် ရလဒ်ကောင်းများ ရရှိစေရန်အတွက် စစ်ဆေးရေးနှင့်စီမံခန့်ခွဲမှုဆိုင်ရာ ကျွမ်းကျင်မှုအရည်အချင်းများသာမက အဖွဲ့အစည်းစိတ်ဓာတ်ဖြင့် မိမိရုံးဝန်ထမ်းများအပေါ် မှန်ကန်မျှတစွာဉီးဆောင်နိုင်သည့် အရည်အချင်းများပြည့်ဝနေရန် လိုအပ်ပါကြောင်း၊ ထို့အပြင် ပြည်သူ့ဘဏ္ဍာငွေကြေးစီမံခန့်ခွဲမှုစနစ်နှင့်ဆက်စပ်သည့် ဥပဒေ၊ နည်းဥပဒေ၊ စည်းမျဉ်း၊ လုပ်ထုံးလုပ်နည်းနှင့် ညွှန်ကြားချက်များကို စဉ်ဆက်မပြတ် လေ့လာမှတ်သားနေရမည် ဖြစ်ပါကြောင်း။
ယခုသင်တန်းတွင် ပုံမှန်သင်ကြားပို့ချမှုများအပြင် စစ်ဆေးရေးအတွေ့အကြုံ၊ ဗဟုသုတများကို ပြန်လည်မျှဝေပေးနိုင်ရေးအတွက် အဖွဲ့ငယ်များခွဲ၍ စာတမ်းများ ဆွေးနွေးတင်ပြမှု အစီအစဉ်ကိုလည်း ဆောင်ရွက်ထားရှိပါကြောင်း၊ သို့ပါ၍ သင်တန်းသားများအနေဖြင့် ယခုသင်တန်းမှရရှိခဲ့သည့် အသိပညာ၊ ဗဟုသုတများကို မှတ်သား၍ လက်တွေ့လုပ်ငန်းခွင်၌ ပြန်လည်အသုံးချခြင်း၊ ခေတ်နှင့်အညီ တိုးတက်ပြောင်းလဲနေသော ပညာရပ်များကို စဉ်ဆက်မပြတ် လေ့လာဆည်းပူးခြင်းတို့ဖြင့် ပြည်သူများယုံကြည်အားထားရသည့် အရည်အသွေးပြည့်ဝ၍ ကျင့်ဝတ်သိက္ခာမြင့်မားသော ဝန်ထမ်းကောင်းများဖြစ်အောင် ကြိုးစားကြစေလိုပါကြောင်း တိုက်တွန်းပြောကြားခဲ့သည်။
ဆက်လက်၍ ပြည်ထောင်စုစာရင်းစစ်ချုပ်ရုံး (နေပြည်တော်) သင်တန်းကျောင်း၊ ကျောင်းအုပ်က သင်တန်းဆိုင်ရာအချက်အလက်များကို ရှင်းလင်းပြောကြားခဲ့သည်။
အဆိုပါသင်တန်းကို ဒီဇင်ဘာ ၁၂ ရက်မှ ၂၀၂၃ ခုနှစ် ဇန်နဝါရီ ၉ ရက်အထိ လေးပတ်ကြာ ဖွင့်လှစ်သင်ကြားသွားမည်ဖြစ်ပြီး ရုံးချုပ်နှင့် နေပြည်တော်စာရင်းစစ်ရုံးတို့မှ သင်တန်းသား သုံးဦး၊ တိုင်းဒေသကြီး/ပြည်နယ်စာရင်းစစ်ချုပ်ရုံးများနှင့် ဒေသစာရင်းစစ်ရုံးတို့မှ သင်တန်းသား ၈၈ ဦး၊ စုစုပေါင်း သင်တန်းသား ၉၁ ဦး တက်ရောက်ကြမည်ဖြစ်ကာ ISSAI Based Financial Audit, ISSAI Based Performance Audit, ISSAI Based Compliance Audit အပါအဝင် ဘာသာရပ် (၆) ခုကို သင်ကြားပို့ချသွားမည်ဖြစ်သည်။
သင်တန်းဖွင့်ပွဲသို့ အမြဲတမ်းအတွင်းဝန်၊ ဒုတိယအမြဲတမ်းအတွင်းဝန်၊ ဒုတိယညွှန်ကြားရေးမှူးချုပ်များ၊ တာဝန်ရှိသူများ၊ သင်တန်းကထိကများနှင့် သင်တန်းသားများ တက်ရောက်ခဲ့ကြသည်။