ပြည်ထောင်စုစာရင်းစစ်ချုပ်ရုံး
သတင်းထုတ်ပြန်ချက်
၂၀၁၉ ခုနှစ် ၊ မေ လ ၃၁ ရက်
၁။ ၂၀၁၉ခုနှစ်၊ မေ လ ၃၁ ရက်နေ့ မွန်းလွဲ (၁ : ၃၀) နာရီတွင် ပြည်ထောင်စုစာရင်းစစ် ချုပ်ရုံး၊ စုပေါင်းခန်းမ၌ မုံရွာစီးပွားရေးတက္ကသိုလ်နှင့် မိတ္ထီလာစီးပွားရေးတက္ကသိုလ်တို့မှ ၂၀၁၈-၂၀၁၉ ပညာသင်နှစ် မဟာတန်းနှင့်နောက်ဆုံးနှစ် ကျောင်းသူ/ ကျောင်းသားများ အလုပ်သင်လေ့လာမှု အရည်အချင်းပြည့်မီစွာ ပြီးမြောက်ခြင်း နှုတ်ဆက်ပွဲအခမ်းအနား ကျင်းပရာ ပြည်ထောင်စုစာရင်းစစ်ချုပ် တက်ရောက်၍ အမှာစကား ပြောကြားခဲ့ပါသည်။
၂။ အဆိုပါအခမ်းအနားသို့ ပြည်ထောင်စုစာရင်းစစ်ချုပ်ရုံးမှ တာဝန်ရှိသူပုဂ္ဂိုလ်များ၊ သင်တန်းကထိကများနှင့် အလုပ်သင်မောင်မယ် ( ၁၄ ) ဉီး တက်ရောက်ခဲ့ပါသည်။
၃။ အခမ်းအနားတွင် ပြည်ထောင်စုစာရင်းစစ်ချုပ်က -
- ဤရုံးအပါအဝင် စစ်ကိုင်း၊ မန္တလေး၊ မကွေး၊ ရန်ကုန်စသည့် တိုင်းဒေသကြီး ၄ ခု နှင့် မွန်၊ ရှမ်း၊ ကချင်နှင့် ချင်းစသည့် ပြည်နယ် ၄ ခုတို့မှ စုစုပေါင်း အနာဂတ်မျိူးဆက်သစ် ၁၀၅ ဉီးတို့သည် အလုပ်သင်လေ့လာခြင်း အရည်အချင်းပြည့်မီစွာ ပြီးမြောက်အောင်မြင်သည့်အတွက် ပြည်ထောင်စုစာရင်းစစ်ချုပ်ရုံးအနေနဲ့ လှိုက်လှိုက်လှဲလှဲ ဝမ်းသာပါကြောင်း၊
- အလုပ်သင်မောင်မယ်များအား ပြည်ထောင်စုစာရင်းစစ်ချုပ်ရုံး၏ အဓိကတာဝန်တစ်ရပ်ဖြစ်သော နိုင်ငံတော်အရအသုံးစာရင်းများ စစ်ဆေးခြင်းအပါအဝင် ဤရုံး၏ ဖွဲ့စည်းပုံအဆင့်ဆင့်၊ စာရင်းစစ်ဆေးခြင်းနည်းလမ်းများ၊ စာရင်းစစ်လုပ်ငန်း မှတ်တမ်းပြုစုထိန်းသိမ်းရေးနည်းစနစ်များ၊ လုပ်ငန်းအထောက်အထားများ မှတ်တမ်းတင်ရေးသွင်းပုံများကို သင်ကြားပို့ချပေးခဲ့ကြောင်း၊
- အလုပ်သင်မောင်မယ်များသည် စာရင်းစစ်ဆေးခြင်းလုပ်ငန်းကို စာတွေ့သာမက မြေပြင်တွင်စစ်ဆေး ဆောင်ရွက်လျက်ရှိသည့် စာရင်းစစ်အဖွဲ့များနဲ့ လိုက်ပါလေ့လာခွင့်များရရှိခဲ့ကြသဖြင့် များစွာအကျိုးရှိမည်ဟု ယုံကြည်ပါကြောင်း၊
- အစိုးရဝန်ကြီးဌာန၊ အဖွဲ့အစည်းများအနေဖြင့် နိုင်ငံတော်၏ငွေကြေးကိစ္စရပ်များကို စီမံခန့်ခွဲရာတွင် ကျင့်သုံးရမည့် ဘဏ္ဍာရေးစည်းမျဉ်းများကို ပို့ချပေးခဲ့သည့်အတွက် ဗဟုသုတများတိုးပွားစေမည် ဖြစ်ပါကြောင်း၊
- နိုင်ငံ့ဘဏ္ဍာငွေကိုအသုံးပြုသည့် ဌာန၊ အဖွဲ့အစည်းတိုင်းသည် မည်သည့်အတိုင်းအတာအထိ ပွင့်လင်းမြင်သာမှုရှိသည်၊ တာဝန်ခံမှုရှိသည်၊ စွမ်းဆောင်ရည်ပြည့်ဝသည်ဆိုသည့်အချက်များကို ဥပဒေနှင့်အညီ စာရင်းစစ်ဆေးမှုခံယူခြင်းဖြင့်လည်း ပြသနိုင်ပါကြောင်း၊
- နိုင်ငံဝန်ထမ်းတစ်ဦးအနေဖြင့် ထမ်းဆောင်ရမည့်တာဝန်၊ ခံစားနိုင်သည့်အခွင့်အရေးနှင့် လိုက်နာရမည့်ကျင့်ဝတ်များကိုလည်း ကထိကများက မျှဝေပို့ချခဲ့ပါကြောင်း၊
- မိမိတို့ပြည်ထောင်စုစာရင်းစစ်ချုပ်ရုံးသို့ စိတ်ပါဝင်စားစွာ လာရောက်လေ့လာပြီး အသိပညာဆည်းပူးခဲ့ကြသည့်အတွက် ဝမ်းမြောက်ပါကြောင်း၊
- အလုပ်သင်မောင်မယ်များသည် တက္ကသိုလ်များက သင်ကြားပေးလိုက်သော အသိပညာ၊ အတတ်ပညာများကို နိုင်ငံတော်တာဝန်ထမ်းဆောင်ရာတွင် အသုံးချနိုင်သည့် အခွင့်အလမ်းများရှိနေကြတာဖြစ်၍ နိုင်ငံ၏ပြုပြင်ပြောင်းလဲရေး ခရီးလမ်းတွင် အုတ်တစ်ချပ်သဲတစ်ပွင့်အနေဖြင့် ပါဝင်ဆောင်ရွက်နိုင်ကြစေရန် တိုက်တွန်းပါကြောင်း။
၄။ ပြည်ထောင်စုစာရင်းစစ်ချုပ်မှ အလုပ်သင်မောင်မယ်များအား အလုပ်သင်ပြီးမြောက်ကြောင်း အသိမှတ်ပြုလက်မှတ် ချီးမြှင့်ပေးအပ်ခဲ့ပြီး အခမ်းအနားကို မွန်းလွဲ ( ၂ : ၀၀ ) နာရီတွင် ရုပ်သိမ်းခဲ့ပါသည်။