၁။ ၂၀၁၃ခုနှစ်၊မေလ(၂၃)ရက်နံနက် ၀၉း၃၀ နာရီတွင်ပြည်ထောင်စုစာရင်းစစ်ချုပ်ရုံး၊ အစည်းအဝေး ခန်းမ၌ မြန်မာနိုင်ငံစာရင်းကောင်စီဥက္ကဌ၊ ပြည်ထောင်စုစာရင်းစစ်ချုပ်နှင့် ဒီပလိုမာစာရင်းကိုင်(ပထမပိုင်း) သင်တန်းသား/သူများ တွေ့ဆုံဆွေးနွေးပွဲ အခမ်းအနား ကျင်းပခဲ့ရာ မြန်မာနိုင်ငံစာရင်းကောင်စီဥက္ကဌ၊ ပြည်ထောင်စုစာရင်းစစ်ချုပ် ဦးသိန်းထိုက် တက်ရောက်တွေ့ဆုံ၍ လမ်းညွှန်အမှာစကား ပြောကြားခဲ့ပါသည်။
၂။ အဆိုပါအခမ်းအနားသို့ ဒုတိယစာရင်းစစ်ချုပ်၊ညွန်ကြားရေးမှူးချုပ်၊လေ့ကျင့် ရေး ဌာနမှ ညွှန်ကြားရေးမှူး၊ ဒုတိယညွှန်ကြားရေးမှူးများ၊ ကထိကများနှင့် သင်တန်းသား/ သင်တန်းသူ (၄၂၅)ဦး တက်ရောက်ကြပါသည်။
၃။ အခမ်းအနားတွင် မြန်မာနိုင်ငံစာရင်းကောင်စီဥက္ကဌ၊ ပြည်ထောင်စုစာရင်းစစ်ချုပ် ဦးသိန်းထိုက် မှ အောက်ပါအချက်များကို မှာကြားခဲ့ပါသည်-
- ပြည်ထောင်စုစာရင်းစစ်ချုပ်ရုံး၊ နေပြည်တော်နှင့်ရန်ကုန်သင်တန်း ကျောင်းများတွင် ဖွင့်လှစ်လျှက်ရှိသည့် ဒီပလိုမာစာရင်းကိုင်သင်တန်းများသည် မြန်မာနိုင်ငံ တွင် ပြုပြင်ပြောင်းလဲမှု အစီအစဉ်များအရ အလျင်အမြန် လိုအပ်လျှက်ရှိသော လက်မှတ်ရပြည်သူ့စာရင်းကိုင်များ မွေးထုတ် ပေးနိုင်ရေး အတွက် ပေါင်းကူး သင်တန်းဖြစ်ကြောင်း
- သင်တန်းသား/သူများသည် သင်ကြားပို့ချနေသည့် ဘာသာရပ်ဆိုင်ရာ သင်ကြားပို့ချမှုများနှင့် စပ်လျဉ်း၍ သင်တန်းချိန်အတွင်း သဘောပေါက် နားလည်ခံယူမှု အားနည်းလျှက်ရှိနေသောကြောင့် ကထိကများနှင့် ဆွေးနွေးပွဲပြုလုပ်ခဲ့ပြီး သင်ရိုး Note Sheet များကို တစ်ပတ်ကြိုတင် ဖြန့်ဝေကာ သင်တန်းသား/သူများမှကြိုတင်လေ့လာ၍ ကထိကများနှင့် Two Way System ဖြင့် သင်ကြားပို့ချသွားမှာဖြစ်ကြောင်း
- သင်တန်းသား/သူများ သင်တန်းတက်ချိန် မှန်ကန်မှုရှိစေရေးအတွက် သင်တန်းခေါ်ချိန်နေ့စဉ် မှတ်တမ်းအား စနစ်ပြောင်းလဲ၍ ဆောင်ရွက် သွားမှာဖြစ်ပြီး သတ်မှတ်ထားသည့်Seating Plan အတိုင်း နေရာယူ၍ သင်ကြားရမှာဖြစ်ကြောင်း
- သင်တန်းသား/သူများသည် ဝန်ကြီးဌာနများမှ ဝန်ထမ်းများဖြစ်သည့် အတွက် ဝန်ထမ်းစည်းကမ်း၊စည်းမျဉ်းများကို လိုက်နာနေရသကဲ့သို့ သင်တန်းတွင်လည်း သင်တန်းစည်းကမ်းကို တိတိကျကျလိုက်နာပြီး အနာဂတ်တွင် စီးပွားရေးများ ဖွံ့ဖြိုးတိုးတက်လာမှုနှင့်အတူ နိုင်ငံတကာ ပြည်ပစာရင်းပညာရှင်များနှင့် ရင်ဘောင် တန်းနိုင်ရေးအတွက် အမှန်တကယ် တတ်ကျွမ်းသည့် စာရင်းပညာကျွမ်းကျင်သူများ၊ စာရင်းပညာ ရှင်များ ပေါ်ထွက်လာစေရန် ကြိုးစားဖို့ အထူးတိုက်တွန်းလိုကြောင်း
၄။ တွေ့ဆုံဆွေးနွေးပွဲအခမ်းအနားကို နံနက် ၁၁း၀၀ နာရီတွင် ရုပ်သိမ်းခဲ့ပါသည်။