လက်မှတ်ရ ပြည်သူ့စာရင်းကိုင်သင်တန်း

၁။ ၁၉၇၂ ခုနှစ် မြန်မာနိုင်ငံစာရင်းကောင်စီ ဥပဒေနှင့်နည်းဥပဒေပါ ပြဌာန်းချက်များနှင့်အညီ မြန်မာနိုင်ငံ စာရင်းကောင်စီသည်လက်မှတ်ရပြည်သူ့စာရင်းကိုင်သင်တန်းကို၉-၁၀-၁၉၇၂နေ့မှ စ၍ ဖွင့်လှစ်ခဲ့ပြီး၊ သင်တန်းကာလမှာ ၂ နှစ် ဖြစ်ပါသည်။ သင်တန်းသားများသည် တနင်္လာနေ့မှ သောကြာနေ့များတွင်နံနက်၇နာရီမှ ၉ နာရီအထိနှင့် စနေနေ့တွင် နံနက်ပိုင်း ၇ နာရီ မှ ၁၁း၅၀ နာရီ အထိ စာတွေ့သင်ကြား ရပါသည်။ လက်မှတ်ရပြည်သူ့စာရင်းကိုင်များအား စာရင်းပညာဖြင့် အသက်မွေးဝမ်းကျောင်းပြုလုပ်နိုင်သူ များအဖြစ်သတ်မှတ်ပါသည်။ မြန်မာနိုင်ငံစာရင်းကောင်စီ၊ စာရင်းကိုင်အလုပ်သင်နှင့်သင်တန်း ကြီးကြပ်ရေးကော်မတီသည်စီးပွားရေးတက္ကသိုလ်များ(ရန်ကုန်၊ မိတ္ထီလာ၊ မုံရွာ) မှ ဝါဏိဇ္ဖဘွဲ့ (B.com) နှင့် စာရင်းကိုင် ပညာဘွဲ့(B.Act) နောက်ဆုံးနှစစာမေးပွဲကို အဆင့်ကောင်းကောင်းဖြင့် အောင်မြင်သူများသည် လက်မှတ်ရ ပြည်သူ့ စာရင်းကိုင်သင်တန်းတက် ရောက်ရန် လျှောက်လွှာကို သတင်းစာများမှတစ်ဆင့် ခေါ်ယူမည် ဖြစ်ပြီး၊ ထိုသတင်း စာလျှောက်လွှာ ခေါ်ကြေညာချက်၌ ဖော်ပြ သတ်မှတ်ထားသည့် နောက်ဆုံးနှစ်စာမေးပွဲ အောင်မြင်သူများသာ လျှောက်ထားခွင့်ရှိသည်။ အဆိုပါနှစ်၌ အကြောင်းကြောင်းကြောင့် မလျှောက်ဖြစ်ခဲ့ သူများသည် နောင်နှစ် သင်တန်းများ၌ တက်ရောက်ရန် လျှောက်ထားပိုင်ခွင့် လုံးဝမရှိပါ။

လျှောက်ထားသူများ၏ နောက်ဆုံးနှစ်စာမေးပွဲရမှတ် စုစုပေါင်းကိုစိစစ်၍ အမှတ်အများအနည်း အလိုက် (In Order of Merit) အမှတ်အများဆုံးရရှိသူများကိုသာလက်မှတ်ရပြည်သူ့စာရင်းကိုင် သင်တန်း(ပထမပိုင်း) ဝင်ခွင့်ရသူအဖြစ် ထုတ်ပြန်ကြေညာလက်ခံပါသည်။

ဒီပလိုမာစာရင်းကိုင်သင်တန်း(ဒုတိယပိုင်း)စာမေးပွဲ အောင်မြင်သူများအနက်ထူးချွန်စွာအောင်မြင် သူများကိုလက်မှတ်ရပြည်သူ့စာရင်းကိုင်သင်တန်းသို့ ပေါင်းကူးတက်ရောက်ခွင့်ကို၂၀၁၁- ၂၀၁၂ပညာ သင်နှစ်၊ လက်မှတ်ရပြည်သူ့စာရင်းကိုင်သင်တန်း အမှတ်စဉ်(၃၇) မှစ၍ ခွင့်ပြုခဲ့ပါသည်။ ဒီပလိုမာ စာရင်းကိုင်သင်တန်း (ဒုတိယပိုင်း) အမှတ်အများဆုံးဖြင့် အောင်မြင်သူများအနက်မှ လက်မှတ်ရပြည်သူ့ စာရင်းကိုင်သင်တန်းတက်ရောက်ခွင့်လျှောက်ထားနိုင်သူများကို မြန်မာနိုင်ငံစာရင်းကောင်စီရုံး၌ ကြေညာ ပေးမည်ဖြစ်သည်။

သင်တန်းတက်ရောက်ခွင့်ရသူသည် သတ်မှတ်ထားသည့် သင်တန်းဝင်ကြေး၊ မှတ်ပုံတင်ကြေးများ ပေးဆောင်ရမည်ဖြစ်ပါသည်။ပထမပိုင်းသင်တန်းစတက်စဉ်ကတည်းက သင်တန်းတက်ရောက်ပြီး(၁)လ အတွင်း နောက်ဆုံးထား၍စာသင်ကြားခြင်း နှင့် အလုပ်သင်ဆင်းခြင်းကိုတပြိုင်နက်တည်း (သို့မဟုတ်) ပထမပိုင်းနှင့်ဒုတိယပိုင်း၂ပိုင်းစလုံးစာမေးပွဲအောင်မြင်မှသာအလုပ်သင်ဆင်းခြင်းနည်းလမ်းနှစ်ခုအနက် တစ်ခုကိုစိတ်ကြိုက်ရွေးချယ်ရမည်ဖြစ်ပြီး ရွေးချယ်ပြီးပါကလုံးဝပြောင်းလဲခွင့်မပြုပါ။ အလုပ်သင်ဆင်းလို သည့်စာရင်းစစ်အဖွဲ့များ၏ အမည်စာရင်း အားသင်တန်းသား/သူမှ ကိုယ်တိုင်ရွေးချယ်နိုင်ခွင့်ရှိပြီးယင်းသို့ ရွေးချယ်ခြင်းမပြုမီ အဆိုပါလုပ်ငန်း၏အခြေအနေအား တိကျစွာစုံစမ်းသိရှိပြီးမှသာရွေးချယ်သင့်ပါသည်။ စာသင်ကြားခြင်းနှင့်အလုပ်သင်ကြားမှုခွဲထုတ်သည့်စနစ်အရ လက်မှတ်ရပြည်သူ့စာရင်းကိုင်သင်တန်းကို မထိခိုက်စေသည့် မဟာဘွဲ့သင်တန်းနှင့် အခြားသင်တန်းများကိုလည်း တက်ရောက်နိုင်ပါသည်။ လက်မှတ်ရပြည်သူ့စာရင်းကိုင် ဒုတိယပိုင်းစာမေးပွဲအား အောင်မြင်ပြီးအလုပ်သင်လုပ်သက်အတွင်း လက်တွေ့လုပ်ငန်းများကို ကျေနပ်ဖွယ်ရာဆောင်ရွက်ပြီး နောက်အတတ်ပညာရပ်ဆိုင်ရာ ကျင့်ဝတ်စာမေးပွဲ ဖြေဆိုအောင်မြင်ပြီးပါက မြန်မာနိုင်ငံစာရင်းကောင်စီတွင် လက်မှတ်ရပြည်သူ့ စာရင်းကိုင်အဖြစ် မှတ်ပုံ တင်နိုင်ပါသည်။

၂။ လက်မှတ်ရပြည်သူ့စာရင်းကိုင်သင်တန်းအမှတ်စဉ်(၄၀)ကို ရန်ကုန်မြို့တွင်သာမက ၂၀၁၄-၂၀၁၅ ပညာသင်နှစ်မှစ၍ နေပြည်တော်တွင်လည်း ဖွင့်လှစ်သင်ကြားလျက်ရှိပါသည်။